Sheteldegi otandastarymyz belsendilik tanytty

Tokıoda №261 jáne Seýlde №258 saı­laý ýchaskeleri jergilikti ýaqyt bo­ıyn­sha saǵat 07:00-de ashylǵan. Qazaq­stan­dyq kásipker Syrymbek Taý Tokıo qalasyndaǵy saılaý ýchaskesinde saılaýǵa eń birinshi bolyp daýys berdi. «Saılaýǵa qatysý – árbir azamattyń boryshy, memle­ket aldyndaǵy paryzy. Biz óz tańdaýy­myzdy jasap, memlekettik iske belsendi aralasýymyz kerek. Memleketimizdiń turaqty damýy men irgesiniń berik bolýy­na árkim óz úlesin qosý qajet. Mine, son­dyqtan da búgin kásipker retinde Tokıo­da issaparmen júrip, óz daýysymdy el bola­shaǵy úshin berýdi jón kórdim», dedi S.Taý.

Al Ońtústik Koreıa astanasyndaǵy №258 saılaý ýchaskesine alǵashqy bolyp qazaqstandyq Iýrıı Soı keldi. Seýl­de 5 jyldan beri turyp jat­qan ol kásipkerlikpen aınalysady. «Qazaq­standaǵy jańalyqtardy belsendi qarap otyramyn jáne eldegi oń ózgeristerdi kórip júrmin. Sondyqtan prezıdent saılaýynda daýys berýge qýana keldim», dedi kásipker.

Atalǵan eki elden soń ýaqyt beldeýine baılanysty Beıjiń, Shanhaı, Gonkong, Sıngapýr, Kýala-Lýmpýr, Ulan-Batyr qalalarynda daýys berý ýchaskeleri óz jumysyn bastady.

Qazir elimizdiń birneshe qurama komandasy shetelderde baıraqty básekege qatysyp jatyr. Syrtqy ister mınıstrliginiń málimetine súıensek, olardyń barlyǵy elshilikterge baryp daýys bergen. Máselen, eskek esýden Qazaqstan quramasy Tashkent­te, jeńil atletıkadan qurama komanda Antalııada, Ulttyq fýtbol qurama komandasy Abý-Dabıde ornalasqan saılaý ýchaskesinde óz tańdaýlaryn jasaǵan. «Majarstandaǵy Eýropa áıelder hokkeı lıgasyna qatysýǵa kelgen almatylyq «Aısulý» klýby Býdapesht qalasyndaǵy №243 saılaý ýchaskesinde, konkımen júgirý sportynan Qazaqstan ulttyq quramasy Nıderlandta daýys berdi. Bokstan Marokko ulttyq quramasyn jat­tyqtyratyn belgili qazaqstandyq bapker Erik Alǵabek Qazaqstannyń Rabattaǵy el­shiligi janyndaǵy saılaý ýchaskesine kelip, mańyzdy naýqanǵa qatysty», dep málimdedi SIM. Jalpy, el azamattary Máskeý men Ystanbul qalalarynda daýys berýde belsendilik tanytqan. Sheteldegi saılaý ýchaskesiniń eń sońǵysy San-Fransıskoda ashyldy.

Kezekten tys prezıdent saılaýyn ótkizý úshin barlyǵy 10 101 saılaý ýchas­kesi qurylǵan. Onyń ishinde 68-i Qazaq­stannyń 53 memleketindegi dıploma­tııalyq ókildiginde ornalasqan.