ASTANA. 30 mamyr. Eýrazııalyq ekonomıkalyq odaqtyń (EAEO – Reseı, Qazaqstan, Belarýs) qurylýy jónindegi kelisimge qol qoıylýy elderdiń ekonomıkalyq jaǵdaılaryna jaqyn keleshekte birden jaqsy áser ete qoımaıdy. Alaıda, bolashaqta olardyń damýyna aıtarlyqtaı oń serpin beredi. Reseı jáne belorýs sarapshylary qazir osyny aıtyp otyr. Bul týraly RIA «Novostı» habarlady.
Reseı, Belarýs jáne Qazaqstan memleketteriniń Prezıdentteri keshe, beısenbi kúni Astanada 2015 jyldyń 1 qańtarynan bastap iske kirisetin EAEO (Eýrazııalyq ekonomıkalyq odaq) qurý jónindegi kelisimge qol qoıdy.
Reseı Ǵylym akademııasy Halyq sharýashylyǵyn boljaý ınstıtýty dırektorynyń orynbasary Aleksandr Shırov bul ıntegrasııalyq birlestikti qurýdyń maqsaty «birtutas ónerkásip, ekonomıka, bálkim, tipti qarjy saıasatyn qalyptastrý, sondaı-aq úsh eldiń enshisindegi resýrstardy jınaqtaý, ózderi úshin damýǵa meılinshe tıimdi baǵyttardy tańdap alý bolǵan».
Sarapshy Reseı, Belarýs jáne Qazaqstan arasyndaǵy ıntegrasııa úderisi birneshe jyldan beri júrip kele jatqanyn, sondyqtan EAEO-ny qurǵannan keıin eshqandaı kúrt ózgeristerdiń bola qoımaıtynyn atap ótti.
«Biz saýdadaǵy kedergilerdi alyp tastaýdyń birinshi kezeńin 2011-2012 jyldary júrgizdik. Sol sátte biz ózara taýar aınalymynyń jarqylyn kórdik. Jalt etken máýrit ótip ketti. Endigi tıimdilik, bálkı, elder arasyndaǵy ekonomıkalyq damý deńgeıiniń teńesýine baılanysty týyndaıtyn shyǵar», - dedi Shırov.
Osy kózqaraspen Belarýs Ǵylym akademııasy Ekonomıka ınstıtýtynyń bólim meńgerýshisi Aleksandr Lýchenok ta kelisedi.
«Kelisimdi bizdiń elderimiz ıntegrasııasynyń mańyzdy quramdas bóligi bolyp tabylatynyn aıtýǵa bolady, biraq jańa jyldan bastap onyń iske qosylýyna baılanysty bizdiń memlketterimiz arasyndaǵy prınsıpti qarym-qatynastarda birden ózgeris bola qalady dep kútýdiń qajeti joq shyǵar», - dep atap ótti ol agenttik tilshisine. Ǵalym sonymen birge kelisimniń úlken jetistikteriniń biri «elder arasyndaǵy qalyptasyp qalǵan qarym-qatynastardy birden ózgertip jiberýge baǵyttalmaǵany ekenine nazar aýdardy.
Alekseı Shırovtyń boljamynsha, úshtik elderi arasynda Eýrazııalyq ekonomıkalyq odaqqa múshe bolýdan eń kóp utysqa jetetini Belarýs, utyǵy barynsha azy Reseı bolmaqshy. «Menińshe, munda barynsha kóbirek tıimdilik tabatyny Belarýs ekonomıkasy, al azy Reseı bolady. Biraq bul Reseı úshin de prınsıpti turǵydan asa mańyzdy, sebebi, osy odaq bizdiń óz resýrstarymyzdy barynsha tıimdi paıdalanýymyzǵa yqpal jasaıdy», - dedi ol.
Murat Aıtqoja.
Derekkóz: RIA «Novostı»
Foto: RIA «Novostı». Mıhaıl Klımentev.
