EAEO XXI ǵasyrdaǵy eń qýatty ekonomıkalyq oıynshy bolady

Eýrazııalyq ekonomıkalyq odaǵy XXI ǵasyrdaǵy álemdik ekonomıka men saıasat arhıtektýrasynyń eń qýatty oıynshysyna aınalady. Reseı Memlekettik dýmasynyń TMD isteri boıynsha komıtetiniń basshysy Leonıd Slýskııdiń bul jónindegi pikirin RIA «Novostı» jarııalady. Reseı, Belarýs jáne Qazaqstan memleketteriniń Prezıdentteri keshe, beısenbi kúni Astanada 2015 jyldyń 1 qańtarynan bastap iske kirisetin EAEO (Eýrazııalyq ekonomıkalyq odaq) qurý jónindegi kelisimge qol qoıdy. «Biz búgin eshbir ásireleýsiz-aq Astanada keń aýqymdy Eýrazııalyq ekonomıkalyq odaq qurý jónindegi kelisimge qol qoıylǵanyn tarıhı kún bolǵanyn aıtýǵa tıispiz. Reseı, Belarýs jáne Qazaqstan eshbir kúmánsiz XXI ǵasyrdaǵy álemdik ekonomıka men saıasat arhıtektýrasynyń eń qýatty oıynshysyna aınalatyn jańa ıntegrasııalyq birlestik qurý jónindegi jańa dáýirge qadam basyp otyr», - dedi Slýskıı jýrnalısterge. Depýtattyń pikirinshe, EAEO kóp jyldar boıy ekonomıkalyq resessııaǵa ushyrap kele jatqan Eýropa men jyldam damý jolyna túsken Azııa-Tynyq muhıt aýmaǵy arasyndaǵy ózdiginshe bir kópirdiń qyzmetin atqaratyn bolady. Slýskıı sonymen birge Memlekettik dýmada kelisimniń óte tez ratıfıkasııa jasalatynyna senim bildirdi. Ol sondaı-aq alys keleshekte Eýrazııalyq parlaıentaralyq assambleıa, sondaı-aq birtutas aqparattyq keńistik qurylyp qalýy yqtımal ekenin alǵa tartty. Murat Aıtqoja. Derekkóz: RIA «Novostı». Foto: RIA Novostı. Vladımır Fedorenko.