Atalǵan qor qazaqstandyq balalar MÁMS júıesinde avtomatty túrde saqtandyrylǵanyn eske saldy. Olar úshin jarnalardy JSN alǵan sátten bastap kámeletke tolǵanǵa deıin memleket tóleıdi. Bul balalarǵa TMKKK aıasynda ǵana emes, MÁMS paketine kiretin medısınalyq kómekti de alýǵa múmkindik beredi.
Áleýmettik medısınalyq saqtandyrý qorynda habarlaǵandaı, emhanalarǵa tirkelgen balalar sany jyl saıyn artyp keledi. 2020 jyly týǵannan bastap 17 jasqa deıingi 6 mln 290 myńǵa jýyq, 2021 jyly 6 mln 467 myńnan astam, al 2022 jyldyń 9 aıynyń qorytyndysy boıynsha 6 mln 568 myńnan astam bala tirkelgen.
«Byltyr balalarǵa TMKKK jáne MÁMS aıasynda jalpy 350 mlrd teńgege medısınalyq kómek kórsetildi. Bıyl 33 %-ǵa ósim kútilýde. 2022 jyldyń 9 aıynda 324 mlrd teńgege medısınalyq qyzmetter kórsetildi», delingen qor aqparatynda.
Shyǵystardyń negizgi úlesin ambýlatorııalyq-emhanalyq kómek (53%) quraıdy. Bıylǵy jyldyń 9 aıynda oǵan 232 mlrd teńge jumsaldy. Osy kezeńde balalar táýlik boıǵy stasıonarlarda 300 myń jaǵdaıda 70 mlrd teńgege jýyq, kúndizgi stasıonarlarda 39 myń jaǵdaıda 3 mlrd teńgege jýyq qarajatqa emdeldi. Budan basqa, aýyldyq stasıonarlarda 15 mlrd teńgeden astam somaǵa 120 myńǵa jýyq bala em aldy. 2022 jyldyń 9 aıynyń qorytyndysy boıynsha balalarǵa joǵary tehnologııalyq medısınalyq kómek kórsetýge 768 jaǵdaı boıynsha shamamen 3,4 mlrd teńge bólindi.
MÁMS júıesi engizilgeli medısınalyq ońaltý syndy mańyzdy baǵyt qarqyndy damyp keledi. Balalar kórsetkishteri boıynsha ońaltýǵa tegin jiberiledi. Atalǵan kezeńde táýlik boıǵy jáne kúndizgi stasıonarlar jaǵdaıynda 70 myńǵa jýyq bala 12,6 mlrd teńgeden astam qarajatqa emdeldi.
Sondaı-aq aýrýlardyń aldyn alýǵa kóp kóńil bólinedi. Atalǵan kezeńde balalardy profılaktıkalyq tekserýge shamamen 30 mlrd teńge baǵyttaldy. 9 aıdyń qorytyndysy boıynsha mektep medısınasy qyzmetteri úshin 20 mlrd teńge tólendi, kúndizgi stasıonar jaǵdaıynda baǵdarlamalyq gemodıalız qyzmetteri 13 mlrd teńgeden astam somaǵa kórsetildi. Balalardy ambýlatorııalyq dári-dármekpen qamtamasyz etýge 5 mlrd teńge bólindi.
«MÁMS júıesi halyqtyń áleýmettik osal toptaryna tegin stomatologııalyq kómek kórsetýge múmkindik beretini belgili. Taldaý kórsetkendeı, MÁMS boıynsha stomatologııalyq kómektiń negizgi tutynýshylary – balalar. 2022 jyldyń 9 aıynda 25,1 mlrd teńgege 8,8 mln-ǵa jýyq stomatologııalyq qyzmet kórsetildi», dep málimdedi qor ókilderi.
Jalpy alǵanda, 1 balaǵa arnalǵan shyǵystar 2021 jylǵy 54,1 myń teńgeden 2022 jyly 65,8 myń teńgege deıin ulǵaıdy.
