Jańa Qazaqstannyń alǵashqy kúni degende meńzep otyrǵany – keshegi ótken Prezıdent saılaýynyń qorytyndysy ekeni kim-kimge de belgili. Ortalyq saılaý komıssııasynyń aldyn ala esebi boıynsha Qasym-Jomart Toqaevqa saılaýshylardyń 81,31 paıyzy daýys bergen. El bolashaǵy alaman tańdaýǵa túsken saılaýdaǵy Qasym-Jomart Toqaevtyń osynaý senimdi jeńisi jańa Qazaqstanmen baılanystyrylýy zańdy ári tabıǵı. О́ıtkeni «myń ólip, myń tirilgen» halqymyz jańa, ádiletti Qazaqstandy qalap otyr. Sol sebepti de saılaýshylardyń kópshiligi aldaǵy jeti jylda Qasym-Jomart Toqaevtyń Memleket basshysy bolǵanyn qalaıdy. Búgin sol halyq qalaýynyń nátıjesin kórip otyrmyz.
Saılaý aldynda kesir, keraýyz sózder de aıtyldy. Búlikke shaqyrǵan áýmeserler de tabyldy. Mundaılardy halyqqa jany ashıdy, eldik múddeni oılaıdy dep áste aıta almas edik. Halyq ta muny túsinbeıtin aqymaq emes. О́zine kimniń dos, kimniń qas ekenin aıyrady. Bolashaǵynyń kimmen birge ekenin halyq tamyrshydaı tap basyp, dál anyqtap boljaıdy. Halyq senimi aldamaıdy. Sol sebepti de el azǵyrǵandarǵa ermeı, saılaýǵa úlken belsendilikpen qatysty. Alamanǵa túsken úmitkerler arasynda is basyndaǵy Prezıdenttiń oq boıy ozyqtyǵy kórinip turdy. Muny saılaýshylar da rastap berdi.
Q.Toqaev jańa, ádiletti Qazaqstandy elmen birge qalaı qurýdyń jospar, baǵdarlamasyn tııanaqtap baıandap berdi. Halyq soǵan sengendikten de zor úmit artyp otyr. Osy arada uly Abaıdyń myna bir shýmaq óleńi oıǵa oralady:
«Seni jaqsy kórmese,
Sener me edi sózińe?
Apyr-aı dep terlese,
Ar emes pe ózińe?!»
Hakim aıtsa aıtqandaı, halyq jaqsy kórmese, el basshylyǵyndaǵy eren eńbegin elemese, saılaýda senim bildirmes edi, el Prezıdenti etip tańdamas edi. Senim bildirdi demek, halyq jaqsy kóredi. Árıne, endi osy senimdi aqtaý kerek. Abaı aıtqandaı, ózine senim bildirgen týǵan halqyn apyr-aı degizip terletkizbeı, azamattyq aryn joǵary ustaıtynyna senim mol.
Qorǵanbek AMANJOL,
aqyn, ardager jýrnalıst,
Halyqaralyq «Alash» ádebı syılyǵynyń laýreaty
