Áleýmettik medısınalyq saqtandyrý qory» KeAQ Astana qalasy boıynsha fılıaly baspasóz qyzmetiniń habarlaýynsha, mektep medısınasy bilim berý uıymdarynda, ıaǵnı tikeleı mektepterde, balabaqshalarda, shaǵyn ortalyqtarda nemese basqa da bilim berý uıymdaryndaǵy balalarǵa medısınalyq qyzmet kórsetýdi kózdeıdi.
Buryn mektep medısınasy ýchaskelik qyzmetke bólingen qarajat esebinen qarjylandyrylǵan. MÁMS júıesin engizý arqyly ol jeke ustanym retinde bólek qarastyryldy. Bul mektep jasyndaǵy balalarǵa arnalǵan aldyn alý sharalarynyń keń aýqymyn qamtýǵa múmkindik beredi. Iаǵnı bul medısınanyń osy bóligine – syrqattyń aldyn alý úshin tolyqtaı tekserýge, qandaı da bir syrqat anyqtalǵan balalardy der kezinde «D» esepke alýǵa, barlyq standarttyń saqtalýyn baqylaýǵa, t.b. erekshe nazar aýdarylady.
Osy jyly qor bilim berý uıymdarynda medısınalyq qyzmet kórsetýge elimiz boıynsha 436 emhanamen 26,1 mlrd teńgege jýyq somaǵa shart jasaǵan. Salystyra qarasaq, 2021 jyly 430 medısınalyq uıym qyzmet kórsetti, sharttardyń quny 22,2 mlrd teńgeni qurady.
Mektep medısınasynyń máni – bilim berý uıymdaryndaǵy balalardy qajetti medısınalyq qyzmettermen qamtamasyz etý. Bul jumys mektep nemese balabaqsha ornalasqan aýmaqqa qarasty emhana jaýapkershiliginde bolady. Bul úshin mektepte medısına qyzmetkeriniń jabdyqtalǵan kabınetteri bar arnaıy qyzmet qurylady. Profılaktıkalyq tekserý nemese vaksınalaý júrgizý úshin mektepke nemese balabaqshaǵa tıisti profıldegi dárigerler keledi. Mundaı is-sharalar aldyn ala josparlanady jáne ata-analarǵa aldyn ala habarlanady.
«Mektep medısınasy bólimshesiniń mindetteri men mańyzdy baǵyttarynyń biri – bólimshe qyzmetiniń jumysyn uıymdastyrý. Shynynda da, mektepke deıin jáne mektep jasynda balalardyń salamatty ómir súrýi qalyptasady, olar ortaǵa beıimdeledi, balanyń densaýlyǵy kúsheıedi nemese kerisinshe, tómendeıdi. Mektep medısınasy bólimshesiniń jumysy osyndaı jaǵdaılardy baqylap, densaýlyq jaǵdaıyndaǵy jaǵymsyz úderisiniń damýyn boldyrmaý úshin uıymdastyrylǵan. Bilim berý mekemeleriniń oqýshylary men tárbıelenýshilerin medısınalyq kómekpen qamtamasyz etý balalar emhanasynyń mektepke deıingi – mektep bólimshesine júktelgen. Bul bólimshe balalar emhanasynyń barlyq basqa bólimshelerimen tyǵyz baılanysta jumys isteıdi. Mektep medısınasy bólimshesiniń qurylymyna bilim berý mekemelerindegi medısınalyq kabınetter kiredi. Bizdiń emhana aýmaǵy boıynsha bólimshede 16 mektep pen 10 memlekettik balabaqsha bar», deıdi Astana qalasyndaǵy №9 emhananyń mektep medısınasy bólimshesiniń meńgerýshisi Azamat Myńbaev.
Mektep medısınasynyń tarıfine vaksınalaý, jyl saıynǵy profılaktıkalyq tekserý, tis dárigeriniń tikeleı oqý ornynda júrgizetin tekserýi kiredi. Sondaı-aq oqý ornyndaǵy dárigerler balalarǵa salamatty ómir saltyn ustaný jóninde is-sharalar ótkizedi. Eger profılaktıkalyq tekserýde patologııa anyqtalsa, onda bala tirkelgen jeri boıynsha emhanaǵa tereńdetilgen medısınalyq tekserýge jiberiledi. Balalardyń vaksınalaý ata-analarynyń kelisimimen Ulttyq egý kúntizbesi boıynsha júrgiziledi. Shuǵyl jaǵdaılarda medısınalyq pýnktte jedel járdem brıgadasy kelgenge deıin balalarǵa alǵashqy kómek kórsetiledi.
Osylaısha, mektep medısınasy mektep oqýshylarynyń densaýlyq jaǵdaıyn úzdiksiz baqylaýdy qamtamasyz etýge jáne qajet bolǵan jaǵdaıda ýaqtyly alǵashqy kómek kórsetýge múmkindik beredi.
