Qazirgi tańda Sokolov-Sarybaı ken-baıytý óndiristik birlestiginde quramy 63 paıyzdyq temirden turatyn túıirtas óndiriledi. Ol temir keni konsentratynan alynady. Bul rette jeńil baıytylǵan kenderdi qoldana otyryp ónerkásiptik synaqtar júrgizilgen. Nátıjesinde, konsentrattaǵy temir quramyn 67,5-68,0 paıyzǵa deıin ulǵaıtýǵa jáne quramyndaǵy temir úlesi 65 paıyzdan asatyn BF-shekemtasynyń tájirıbelik partııasyn alýǵa qol jetkizildi.
«Joǵary deńgeıdegi zertteýler jańa ónimniń sapasyn dáleldeýge múmkindik berdi. Tamyz aıynda joǵary sapaly domendik shekemtastardyń eki partııasy shyǵarylyp, SGA (Germanııa) zerthanasyna jiberildi. Oń qorytyndy alyndy. Halyqaralyq sertıfıkat ónimniń hımııalyq quramy, fızıka-mehanıkalyq jáne metallýrgııalyq parametrleri boıynsha málimdelgen sıpattamalaryn rastady. Qazir álemde temir mólsheri 65 paıyz bolatyn túıirtasqa, ıaǵnı okatyshqa suranys artty», dep habarlady ERG-diń baspasóz qyzmeti.
BF-shekemtastar óndirisin ıgerýdiń mańyzy zor. Birinshi kezekte ónerkásiptik keshende baıytý ýchaskesiniń tehnologııalyq tizbegin jańǵyrtý qajet. Bul konsentrattyń sapasyna oń áser etedi. Konsentrattaǵy temirdiń úlesin 67,5 paıyzǵa deıin jáne odan joǵary deńgeıge kóterýge jaqsylap elekten ótkizý men magnıtti-gravıtasııalyq ajyratýdyń keshendi tehnologııasy septesedi. Konsentrattaǵy ylǵaldyń massalyq úlesiniń kórsetkishin tómendetý ári turaqtandyrý úshin keramıkalyq vakýýmdy súzgiler ornatylady. Birinshi kezeńde jańǵyrtý nómiri 11, 13, 14-tehnologııalyq bólikterinde júrgiziledi.
Qazir Ken daıyndaý jáne baıytý sehynda baıytý ýchaskesiniń III kezeginiń bólikterinde konsentrat óndirisiniń tehnologııalyq tizbegin jańǵyrtý jumystary bastaldy. 2023 jyldyń I toqsanynda ónerkásiptik keshenge negizgi tehnologııalyq jabdyqtar – keramıkalyq súzgiler, magnıttik-gravıtasııalyq aıyrǵyshtar, Derrick elegishi jetkiziledi. Qurylys-montajdaý jumystarymen birge ınvestısııa kólemi shamamen 2,8 mlrd teńgeni quraıdy.
«ERG Sales-pen Eýropalyq metallýrgııalyq kásiporyndardyń birine keıinnen jetkizý úshin BF-shekemtastardyń tájirıbeli ónerkásiptik partııasyn óndirý qajettiligi týraly ýaǵdalastyqqa qol jetkizildi. Quramynda keminde 68 paıyz temir bar joǵary sapaly konsentrat óndirý úshin qyrkúıek aıynda Sokolov jáne Qashar karerleriniń, Sokolov shahtasynyń jeńil baıytylatyn kenderinen shıhta qalyptastyrylǵan. Qazan aıynda Sokolov-Sarybaı ken-baıytý óndiristik birlestiginiń ónerkásiptik kesheninde 64,9 myń tonna kóleminde BF-shekemtastardyń tájirıbelik partııasy óndirildi. Túıirtastardaǵy temirdiń quramy – 66,1 paıyz», delingen resmı habarlamada.
