Osy oraıda Mádenıet jáne sport mınıstrligi uıymdastyrǵan Astana Piano Passion respýblıkalyq jas pıanıster baıqaýyn erekshe atap ótkimiz keledi. Kúni keshe ǵana el astanasynda jeńimpazdary marapattalǵan óner dodasynda esimin el bile qoımaıtyn birqatar talantty pıanıst jarqyraı kórindi.
Bıyl tuńǵysh ret ótkizilip otyrǵan baıqaýǵa 7 jastan 17 jasqa deıingi jas órender qatysty. Nátıjesinde, óz sheberligimen oza shapqan Almaty qalasynan kelgen 15 jastaǵy Juldyz Erjeńis Astana Piano Passion Gran-prı ıegeri atanyp, 3 000 000 teńgege ıe boldy. Bul jastar arasyndaǵy shyǵarmashylyq báıgelerdiń arasynda aýqymdy syılyq ekenin de aıta keteıik. Sondaı-aq bas júldegerge «Astana Opera» teatrynyń kameralyq zalynda jeke konsert uıymdastyrýǵa hám maestro Alan Bóribaevtyń jetekshiligimen sımfonııalyq konsertke qatysýǵa múmkindik berildi.
«Mádenıet salasyndaǵy mańyzdy baǵyttardyń biri – elimizdegi jas talanttardy qoldaý, olardyń shyǵarmashylyǵyna jol ashý. Búgin jeńimpaz atanǵan ul-qyzdarymyz bolashaqta álem sahnalaryn baǵyndyra alatynyna senimdimin. Aldaǵy ýaqytta is-shara aýqymyn budan da keńeıtýimiz kerek. Sebebi mýzykada shekara bolmaıdy, kez kelgen áýenniń tili barsha halyqqa ortaq», dedi Mádenıet jáne sport mınıstri Dáýren Abaev Gala-konsertte.
Aıta keteıik, baıqaý qorytyndysy boıynsha úsh jas sanaty boıynsha úzdik mýzykanttar júldeli oryndarǵa ıe boldy. Barlyǵyna aqshalaı sertıfıkattar tabystaldy. Kishi topta I oryn men 1 000 000 teńge Jansaıa Ońǵarbaevaǵa (pedagog Janna Zdornova) buıyrdy. II oryn men 600 000 teńge Aman Dúısekeevke (pedagog Menzııa Daýkeeva) berildi. III oryn men 400 000 teńgeni Beksultan Kópbaı aldy (ustazy Hadıcha Bekısheva). Sondaı-aq Tımýr Levýshın baıqaýdyń dıplomanty atandy (pedagog Anna Pestova).
Al orta topta I oryn men júldeli 1 500 000 teńgeni Aleksandr Volokıtın ıelendi (pedagog Svetlana Korneva). II oryn men 900 000 teńgeni Aıtóre Azamatuly men Aıdar Shaıhov ózara bólisti. Olardyń oqytýshylary – Gúlnar Pak jáne Sholpan Qarajigitova. III oryn men 600 000 teńge Marlen Aldabaevqa, Dýlatı Lııa men Tólemis Altaırge buıyrdy (pedagog Marııa Iаshenko). Budan bólek birqatar jas pıanıst arnaıy dıplommen marapattaldy.
Eresek toptaǵy I oryn men 2 000 000 teńgeni Batyrjan Tankeev jeńip aldy (ustazy Sara Shákirqyzy). Al 1 200 000 syıaqysy bar II oryndy Danıal Dúısembaev pen Mhıtarıan Ashot bólisti (pedagogter – Svetlana Surapbergenova jáne Aleksandra Naýmova). 800 000 teńgeni quraǵan III oryndy Bekmyrza Janas pen Tımofeı О́tegenov ıelendi (oqytýshylar – Dana Álı jáne Altaı Qusaıynov). Munda da birqatar qatysýshy dıplomant atanyp, arnaıy dıplomdar tabystaldy.
Al «Úmit» arnaıy syılyǵy Jandar Serikhanǵa tapsyryldy.
