Atalǵan jarysta Asyljan Baqytjanuly da óner kórsetedi. Aýyr salmaqta aıqasyp júrgen 31 jastaǵy qazaq sportshysy buǵan deıin ASA jarystarynda tabysty óner kórsetip, ár kez úzdikter qatarynda boldy. Oktagonda barlyǵy 13 kezdesý ótkizgen «Saq» sol básekelerdiń 10-yn óz paıdasyna sheshti. Segiz qarsylasyn aıqyn basymdyqpen utty. Sońǵy jekpe-jegin Asyljan 17 qyrkúıekte ırandyq Hasan Iýsefımen ótkizip, ony ekinshi raýndta qylqyndyryp tastady.
Ekaterınbýrgtegi bul jolǵy qarsylasy da óte qarymdy. Ol reseılik Ivan Shtrykovpen aıqasady. 34 jastaǵy Habarovsk týmasynyń sambodan Álem kýboginiń qola júldegeri degen ataǵy bar. Ol aralas jekpe-jekpen 2015 jyldan beri shuǵyldanyp júr. Sol aralyqta 24 kezdesý ótkizip, sonyń 21-inde jeńiske jetti. 15 básekelesin aıqyn basymdyqpen utty. Eki ret utylyp, taǵy bir aıqasta teń esep tirkeldi.
