Baqyttyń mekenin ulyqtaǵan joba

Otbasy qundylyǵy artqan saıy­n qoǵamdaǵy birliktiń nyǵaıa túseri anyq. Elimizdiń bas qalasynyń demo­grafııalyq ósiminde de jyl saıyn oń kórsetkish baıqalady. Yntyma­ǵy­myzdyń uıytqysy bolyp otyrǵan baqytymyzdy baǵalaı túsý úshin Astana qalasynyń Jastar saıasaty máseleleri bas­qarmasy dástúrli túrde «Otbasy – ba­qyt mekeni» atty keshendi jobany sátimen uıymdastyrýda. Jobada otba­sylyq marafon; jas otbasylarǵa, júkti áıelderge jáne ata-ana bolýdy jos­parlap otyrǵan jas jubaılarǵa ar­nalǵan semınar-trenıngter; kolledj­der men joǵary oqý oryndarynyń stýdentterine arnalǵan synyptan tys is-sharalar; beınebaıqaýlar; fotosýretter baıqaýlary bar.

Elordalyq jas otbasylarǵa arnalǵan «Úzdik jas otbasy» jalpyqalalyq baı­qaýy osy jyldyń 24 qazanynda bastalǵan-dy. Bir aıǵa sozylǵan baıqaý qo­ry­tyndysy Astana qalasyndaǵy Qazaqstan Qarýly Kúshteriniń Áskerı-tarıhı mura­jaıynda ótti.

Baıqaý erejesine sáıkes, qatysýshy otbasylar úzdikter qatarynan tabylý úshin «Nelikten bul baıqaýda jeńiske jetýimiz kerek?» taqyrybynda beıne vızıtka jazsa, al fınalıster Instagram jelisinde lúpilder jáne pikirler sany boıynsha anyqtaldy. Baıqaýǵa 53 otbasy qatysqanymen, fınalǵa tek 10-y joldama aldy.

Jastar saıasaty máseleleri bas­qar­masynyń basshysy Qaırat Qambarovtyń aıtýynsha, jas otbasylardy qoldaý – jastar saıasaty salasynyń negizgi mindetteriniń biri. Osy baǵytta «Otbasy – baqyt mekeni» is-sharalar kesheni elordada birneshe jyl qatarynan uıymdastyrylyp keledi. Osy ýaqytqa deıin júgirý marafony, semınar trenıngter, túrli baıqaýlar ótkizildi.

«Bul baıqaýǵa barlyǵy myńnan asa jas otbasy qatysyp jatyr. Dál 1 aı buryn ótinimder qabyldaý bastalǵan edi. Solardyń ishinen fınalǵa tek 10 ot­basy shyǵyp otyr. Elordamyzdyń jas otbasylaryn osyndaı baıqaýlarǵa qatysýǵa shaqyramyn. Saıys bolǵannan keıin jeńgeni de, jeńilgeni de bolady. Barlyǵy laıyqty, qazylar alqa­syna ońaı bolmaıtyny anyq», dedi Q.Qam­barov.

Sonymen, baıqaý nátıjesi belgili bolyp, jeńimpazdarǵa turmystyq tehnıka men elektronıka satyp alýǵa arnalǵan aqshalaı sertıfıkattar berildi. Atap aıtqanda, 1-oryn alǵan Sembekovtar otbasy (Qazybek Sembekov, Aqerke Tileý­bekova) – 500 myń teńge, 2-oryn al­ǵan Balabekovter otbasy (Baǵlan Bala­be­kov, Arýna Nııazbek) – 350 myń teńge jáne 3-oryn alǵan Botashevtar otbasy (Arman Botashev, Aıǵanym Botash) 250 myń teń­geniń sertıfıkatymen marapattaldy.

Buǵan qosa baıqaý fınalyna ótken qatysýshylardyń barlyǵy marapatsyz qalmady. Iаǵnı qalǵan 7 otbasy da 100 myń teńgeden jubanysh syılyǵyna ıe boldy.

Atalǵan baıqaý ár otbasyndaǵy qa­rym-qatynasty nyǵaıtýǵa, balalar men ata-analardy jaqyndastyrýǵa ǵana emes, sondaı-aq kishkentaılardy salamatty ómir saltyna baýlýǵa jáne qoǵamǵa beıimdeýge yqpal etedi.

«Qýanyshymyzda shek joq. Biz úshin ómirimizdegi erekshe sát boldy. Otbasymyz tórt adamnan turady. Men – áskerı qyzmetkermin, jubaıym bala­baqshada bala tárbıesimen aınalysady. Ulymyz – memlekettik bala­baqsha tárbıelenýshisi. Qyzymyz – úıde ata-apasynyń qolqanaty. Bizdiń otaý qur­ǵanymyzǵa 5 jyl boldy. Alǵash úı bolǵan sátten talaı qıynshylyq pen qýanyshta bir-birimizge arqa súıep, ónip-ósip kelemiz. Jubaıymyz ekeýmizdiń de týyp ósken jerimiz – Abaı oblysynyń Abaı aýdanyndaǵy Arhat aýyly. Mek­tep kezinen bastalǵan mahabbatymyz otbasyn qurýmen jalǵasty. Baǵy­myzdy synap kórgen búgingi saıysta ata-ana­larymyzdyń qoldaýyn jaqsy sezin­dik. Saıystyń jas otbasylarǵa bergen dúnıesi mol boldy» dep aqjarma tilegin bildirdi, jeńimpaz bolǵan otbasynyń otaǵasy Qazybek Sembekov.

Baıqaý fınalynda estradadaǵy belgili jup Qydyráli men Qaraqat ánmen shashý shashsa, street workout qoz­ǵa­lysynyń negizin qalaýshy Aıtym Jakýpov, jýrnalıst Aıkerim Esenáli, M.Gorkıı atyndaǵy Memlekettik orys drama teatrynyń dırektory Ernar Jumataev, «Móldir Muqanovanyń óner-bilim ortalyǵynyń» negizin qalaýshy Móldir Muqanova jáne medıamenedjer, prodıýser Alpamys Sharımov jáne taǵy basqalar jas otbasylarǵa erekshe qoldaý bildirdi.