Is-sharalar kesheni barysynda Astana polıseıleri aldyn ala sóz baılasý boıynsha jalǵan medısınalyq anyqtamalardy ótkizý arnasyn uıymdastyrǵan JShS-niń eki basshysyn ustady. Aqshalaı qarajat úshin olar medısınalyq uıymǵa is júzinde barmaı-aq ýaqytsha eńbekke jaramsyzdyq paraqtaryn, densaýlyq pasporttaryn, sanıtarlyq kitapshalardy, №086, 075ý nysanyndaǵy anyqtamalardy jáne ózge de medısınalyq qujattardy daıyndaǵan.
Astana qalasy PD krımınaldyq polısııa basqarmasynyń qyzmetkerleri jedel-tergeý is-sharalary keshenin ótkizý kezinde medısınalyq ortalyqtyń 33 jastaǵy basshysyn ustady. Tintý barysynda ustalǵan adamnan aqshalaı qarajat, eltańbalyq mórler, medısınalyq mórtabandar, medısınalyq anyqtamalardan úzbeli túbirtekter baılamdary, tirkeý jýrnaldary, medısınalyq kitapshalar, mórleri bar toltyrylǵan aýrýhana paraqtary tárkilendi.
Sondaı-aq elordadaǵy Áýezov kóshesinde ornalasqan medısınalyq ortalyqtyń da basshysy ustaldy. Tintý barysynda odan medısınalyq kitapshalar, aýrýhana paraqtary, mórler tárkilendi. Klıentter jumysqa ornalasý, kólik quraldaryn basqarý úshin júrgizýshi kýáligin alý jáne basqa da qajettilikteri úshin medısınalyq anyqtamalarǵa tapsyrys bergeni anyqtaldy.
