«QazMunaıGaz» qaýipsizdikti qamtamasyz etedi

«Apat aıtyp kelmeıdi» deıdi halyq danalyǵy. Eshkim qalamasa da, eshkim kútpese de ol oryn almaı turmaıtyndyǵyna mysal da, dálel de kóp. Olar baıqaýsyzda jiberilgen sáldeı qatelik nemese tehnıkalyq aqaýlyqtar, tipti, lań salyp júrýdi jany qalaıtyn lańkester áreketi saldarynan týyndap jatady. Qaı orynda, qaı dárejede bolsa da sońy ashy qaıǵy men aýyr zardaptarǵa soqtyratyn apattardyń alyp óndiris oryndarynda oryn alýy qaıǵy men zardaptar aýqymyn, salmaǵyn eselep jiberetini belgili. Bul qasiret, bul sátsizdik, árıne, eshkimge qajet emes... Aqtaý qalasynda «QazMunaıGaz» UK» AQ pen «QazTransOıl» AQ birlese ótkizgen eki kúndik oqý-jatty­ǵýdyń maqsaty da osy. Alǵashqy kúni sala mamandary men tótenshe jaǵdaılarda birlese qımyldaýǵa tıisti mekemeler ókilderi teorııalyq baǵytta bas qosyp, kóterilip otyrǵan taqyrypqa qatysty ózekti máselelerdi ortaǵa saldy. «QazMunaıGaz» kompanııalar tobynyń óndiristik nysandary jumysyna zańsyz aralasý, lańkester týyndatqan tóten­she jaǵdaılarda tıimdi jáne jumyla áreket ete bilýge daıyndaıtyn, sondaı-aq qajetti is-qımyldy oqyp-úırený jat­ty­ǵýy «QazTransOıl» AQ Ba­tys fılıalynyń «Aqtaý» bas mu­naı aıdaý stansasy bazasynda ótti. 50-ge jýyq órt sóndirý jáne apattan qutqarý tehnıkalary shoǵyrlanyp, «oqıǵaǵa» qa­jettiligi bar ózge de qural-jab­­dyqtarmen qamtylǵan keń alań­ǵa «QazMunaıGaz» qura­myn­daǵy 20-dan astam kor­po­ra­tıvtik qaýipsizdik qyz­meti­niń qyzmetkerleri bar, mo­bıl­di kúzet toptary, Mań­ǵys­taý oblysyndaǵy qaýipsizdik or­gan­dary men ishki ister sa­lasy­nyń qyzmetkerleri, son­daı-aq qutqarý qyzmeti men órt qaýip­sizdigi salasy qyz­met­ker­leri bar, óńirdegi munaı-gaz me­ke­meleri basshylary bar – bar­­lyǵy 200-den astam adam jıyl­­dy. Al oqý-jattyǵýǵa Qor­ǵa­­nys mınıstrliginiń «Ba­tys» aımaqtyq basqarmasy te­ńiz-jaıaý áskerler brıgadasy, «Semser-Security» JShS kú­zet qyzmeti, «Semser-О́rt són­dirýshi» JShS órtke qarsy qyzmet bólimsheleri, Mańǵystaý ob­lystyq lańkestikke qarsy kú­res jónindegi jedel shtab, Mań­ǵys­taý oblystyq IID, ob­lys­tyq TJD, oblystyq UQK de­par­ta­men­ti, «О́rt sóndirýshi» AQ, «MAEK-Qazatomónerkásip» JShS, «Medıker» JShS, «Qazaq­telekom» AQ qyzmetkerleri qatysty. Aldymen qatysýshylar men qonaqtarǵa oqý-jattyǵý barysy men arnaıy qural-jabdyqtar tanystyrylyp, qaýipsizdik sharttary túsindirildi. – Bul keshendi trenıng «QazMunaıGaz» UK» AQ-tyń 2013-2017 jyldarǵa arnalǵan qaýip­sizdik baǵdarlamasyn jú­ze­ge asyrý jónindegi shara­lar josparyna jáne atalmysh kompanııanyń nysandary men onyń enshiles jáne táýel­di uıymdaryn lańkestik áre­ketterden qorǵaýdy uıym­das­tyrý josparyna sáıkes ótý­de. Nysandardaǵy óndiristik qyz­mettegi qyzmetkerlerdiń tótenshe jaǵdaılarǵa daıarlyǵyn, qoldaǵy tehnıkanyń naqty jaǵdaıy men órt qaýipsizdigin qamtamasyz etýshi júıeniń ázirligin keshendi turǵyda tekserý maqsat etil­gen oqý-jattyǵý arqyly oqys oqıǵalar kezinde basshy aza­mat­tardyń, mamandardyń, qu­ry­lymdyq bólimderdiń adam­dardy qorǵaý boıynsha jumysty basqarý bilimin jetildirý, bilik­tiligin arttyra túsýde oıy­myz da bar. Jáne qandaı jaǵdaıda da jumys yrǵaǵynyń toqtamaýyn, josparlarǵa saı júrip jat­qan úrdisterdiń úzilmeýin de bas­­ty nazarda ustaý kerek, tak­tıkalyq oqý-jattyǵý kezinde osy máselelerge de mán be­rip, qamtıtyn bolamyz, – dedi oqý-jattyǵýdyń ashylý sózin­de «QazMunaıGaz» UK» AQ kor­­­poratıvtik qaýipsizdik de­par­tamentiniń dırektory B.Janasaev. Oqý-jattyǵý eki kezeńnen turdy. Aldymen eki belgisiz adam munaı ónimderi saqtalǵan árqaısysynyń syıymdylyǵy 20000 m³ rezervýarlar mańyna urlana basyp taıap keldi de, qoldaryndaǵy qorapshalaryn rezervýar mańyna aparyp úlgerdi. Osy kezde olardy baıqap qalǵan kúzet mekemesiniń qyzmetkerleri dereý jetip, kúdikti tulǵalardy qolǵa túsirdi. Oqıǵa bolǵan jer­di qorshap, tıisti oryndarǵa jedel habarlady. UQQ «Arlan» ar­naıy toby, IID qyzmetkerleri, óz­ge de quzyrly mekemeler qyz­­metkerleri kelip, qorapqa sa­lynǵan jarylǵysh zatty zalalsyzdandyrý, oqıǵa ornyn tekserý, qaýipsizdigin qadaǵalaý ju­mystaryn júzege asyrdy. Biraq, jarylǵysh zat óz zar­­da­byn tıgizgen eken, kóp uza­maı №18 rezervýardan órt shyq­ty. Osy kezde jetken órt són­dirýshiler órtti aýyzdyqtap, qyzýy kóterilgen kelesi rezervýardy da salqyndatyp, qysymyn qalypty jaǵdaıǵa túsirý úshin árekettendi. Al, jattyǵýdyń ekin­­shi kezeńi «Qalamqas – Qara­jan­bas – Aqtaý» munaı quby­ry boıyn­daǵy oqıǵamen beınelendi. Munda da qubyrdy kesip, aram oıyn júzege asyrmaq bolǵandar quqyq qorǵaý oryndarynyń qarmaǵynan qutylǵan joq. Oqý-jattyǵý sońy belsen­dilik tanytqan úzdikterdi marapattaýmen aıaqtaldy. «Saqtansań, saqtaımyn» de­gen­deı, qaı kezde de abaı bol­ǵannyń aıyby joq... Gúlaıym ShYNTEMIRQYZY, «Egemen Qazaqstan». Mańǵystaý oblysy.