Sýretti túsirgen Erlan OMAR, «EQ»
Is-sharalarǵa áskerı bólimderdiń jeke quramy, jergilikti atqarýshy organdar, qoǵam ókilderi, qarýly kúshter men jergilikti qaqtyǵystarǵa qatysqan ardagerler, jas sarbazdardyń týystary men jaqyndary qatysty.
«Ońtústik» óńirlik qolbasshylyǵynda 1600-den asa sarbaz ant berdi. Tarazda saltanatty is-shara «Jeńis» qalalyq saıabaǵynda ótti. Ásker qolbasshysy, general-maıor Mereke Kúshekbaev sarbazdardy osyndaı eleýli kúnmen quttyqtady.
– Baýyrjan Momyshuly atyndaǵy mehanıkalandyrylǵan quramanyń jaýyngerleri Jeńis saıabaǵynda, batyr eskertkishiniń janynda Otanyna adal bolýǵa ant berýi jaýyngerlik dástúrdiń jalǵasyp kele jatqanyn bildirse kerek. Otan aldyndaǵy qyzmetterińdi abyroımen atqarasyńdar dep senemin, – dedi general-maıor Mereke Kúshekbaev.
Aqtaýdyń áskerı-teńiz bazasynda da osyndaı saltanatty is-shara teńizshi jaýyngerlerdiń sapqa turýymen bastaldy. Pavlodar jáne Shyǵys Qazaqstan oblystarynan shaqyrylǵan matrostar bir aı ishinde teńizshilerdiń tirshiligin úırenip, kemedegi qyzmet negizderimen jáne teńiz termınologııasymen tanysyp úlgerdi.
– Áskerge Pavlodar oblysynan keldim. Árıne, armııanyń ómir yrǵaǵy múlde bólek, bári kún tártibi jáne erejelerge sáıkes jasalady. Áskerı-teńiz kúshterine kelgenime qýandym. Teńizshi bolý – jaýapkershiligi mol jáne qyzyqty. Mundaǵy erekshe dástúrlerdi komandırler de tanystyryp jatyr, – dedi matros Aıaz Masyqbaev.
Kóptegen sarbazdyń ata-analary men jaqyndary saltanatty ant qabyldaý rásimine qatysýǵa keldi. Keshe ǵana bozbala bop kelgen balalarynyń kelbetinen eseıgenin baıqadyq dep aıtyp jatty.
– Búgin uldarymyz úshin mańyzdy kún – ant berý sátin kórdik. Bul, ásirese, desant jaýyngerler úshin úlken jaýapkershilik pen abyroı. Áskerdegi boryshyńdy óteý er azamattar úshin ózine degen senimdilikke tárbıeleıtin tamasha ómir mektebi bolary anyq, – dedi Pavlodardan elordadaǵy desanttyq-shabýyldaý quramasyna shaqyrylǵan Abzal Samattyń anasy Gúljanat Hamıtova.
Komandırler is-sharaǵa kelgen qonaqtardy sarbazdar qyzmet etetin jaǵdaımen tanystyryp, olardyń áskerı qyzmet tóńiregindegi suraqtaryna jaýap berdi.
Jalpy daıyndyq kýrsynan keıin áskerı qyzmetshiler túrli mamandyqtardy úırene bastaıdy. Olarǵa shtattyq qarý-jaraq pen áskerı tehnıka bekitiledi.
