Kezdesý barysynda Prezıdent búginde halyqaralyq qoǵamdastyq kúrdeli geosaıası jáne ekonomıkalyq máselelermen betpe-bet kelip otyrǵanyn aıtty. Onyń aıtýynsha, jańa syn-qaterler jańa múmkindikterge jol ashady. Qıyn-qystaý kezeń – baılanys ornatyp, seriktestikti damytý úshin qolaıly ýaqyt.
«Biz ortaq ekonomıkalyq jáne saıası múddelerimizdi odan ári ilgeriletý úshin Fransııamen jáne jalpy Eýropamen aradaǵy qarym-qatynasty jolǵa qoıǵymyz keledi», dedi Qasym-Jomart Toqaev.
Memleket basshysy Qazaqstan erkin jáne básekege qabiletti naryqtyq ekonomıkany nyǵaıtýdy kózdep otyrǵanyn atap ótti. Sondaı-aq monopolııadan arylý Qazaqstandy qýatty, básekege qabiletti jáne ınvestorlarǵa tartymdy etedi dep sanaıdy. Ol bıznes ahýaldy jaqsartý úshin zańnamaǵa odan ári tıisti ózgertýlerdi engizýge daıyn ekenin jetkizdi.
«Bul jumystyń alǵashqy nátıjeleri makroekonomıkalyq derekterden kórinip otyr. Bıylǵy 10 aıda JIО́ ósimi 2,5 paıyzdy qurady. Bul boljanǵan nátıjeden joǵary. Qoldanystaǵy tasymal tizbeginiń úzilýine qaramastan bizdiń eksportymyz 50 paıyzǵa (63,8 mlrd dollar) jýyq ósti. 2022 jyldyń alǵashqy alty aıynda sheteldik seriktesterimiz bizdiń ekonomıkamyzǵa shamamen 15 mıllıard dollar ınvestısııa quıdy. Bul ótken jylmen salystyrǵanda shamamen 30 paıyzǵa kóp. Aldaǵy 7 jylda biz 150 mıllıard dollar tikeleı shetel ınvestısııasyn tartýdy josparlap otyrmyz. Qazaqstan ınvestısııa salý jóninen Ortalyq Azııadaǵy eń tartymdy el bolýy úshin ınvestısııalyq saıasatymyzdy únemi jetildirip otyramyz», dedi Qasym-Jomart Toqaev.
Bul rette, Prezıdent Fransııa Qazaqstannyń negizgi ekonomıkalyq áriptesteriniń biri ekenin atap ótti.
«Bıylǵy toǵyz aıda Qazaqstan men Fransııa arasyndaǵy taýar aınalymy 12 paıyzǵa ósti. Búginde 170-ten astam fransýz kompanııasy, sonyń ishinde Total Energies, Orano, Airbus, Vicat, Air Liquide, Alstom, Saint-Gobain jáne basqalary Qazaqstanda tabysty jumys istep jatyr. Olardyń barlyǵy Qazaqstan ekonomıkasyna eleýli úles qosyp keledi. Fransııanyń Qazaqstandaǵy Saýda ókildigin qurý yntymaqtastyǵymyzdy nyǵaıtýǵa óz septigin tıgizer edi dep sanaımyn. Biz onyń tezirek qurylǵanyn quptaımyz. Sondaı-aq fransýz kompanııalaryn elimizdiń ınvestısııalyq múmkindikterin qarastyrýǵa shaqyramyn. Jıynǵa qatysýshylardyń bárine Qazaqstan qaýipsiz jáne turaqty ınvestısııalyq orta qalyptastyrýǵa kepildik beretinin nyq senimmen aıta alamyn», dedi Memleket basshysy.
Sonymen qatar Memleket basshysy energetıka, kólik jáne logıstıka, sıfrlandyrý salalaryndaǵy yntymaqtastyq perspektıvalaryna toqtaldy.
Prezıdent Qazaqstan men Fransııa arasyndaǵy ekonomıkalyq seriktestik barlyq salada ártaraptanyp, keńeıe beretinine senim bildirdi.
«Búgingi konstrýktıvti dıalog bıznesti órkendetýge jáne ortaq damýǵa nıetti ekenimizdi taǵy da naqtylaýǵa múmkindik beredi. Meniń ákimshiligim fransýz kompanııalaryna óńirdegi ekonomıkasy eń qarqyndy damyp kele jatqan elderdiń birinde bıznes júrgizýi úshin barlyq qajetti qoldaý kórsetýge daıyn», dedi Memleket basshysy.
