Reseıde qazaqtyń kıiz úıine degen suranys artyp keledi

ASTANA. 3 maýsym. Ata-babalarymyzdan bizge mura bolyp qalǵan qazaqtyń qarapaıym kıiz úıi búginde reseılikterdiń qyzyǵýshylyǵyn arttyryp otyr. Bul týraly «24kz» habarlady. Aıdar Beısenbaev degen qostanaılyq kásipker kıiz úı óndirisin qolǵa alǵaly bes jyl bolypty. Tipti, onyń ónimderi Reseı naryǵynda satyla bastady. Kásipker Keden odaǵy ashylǵaly ónimderin ótkizý máselesi sheshimin taba bastaǵan. Aıdar Beısenbaev: «Kedendik odaqtyń paıdasy óte zor, óıtkeni kıiz úılerdi eksportqa shyǵarý jeńilirek boldy. Qazir burynǵydaı qaǵazdardy kóp daıyndap keregi joq. Tutynýshylar keregin ózderi alyp ketedi. Reseılikter qazaqtyń kıiz úıin ekotýrızmdi damytý maqsatynda satyp alady. Syrt elge saýdalanatyn buıymdardyń ulttyq boıaýy qanyq. Bizdiń maqsatymyz – babamyz tutynǵan baspanany brendke aınaldyryp, suranysty arttyrý», – dedi. Aıdar Beısenbaevtyń basqarýyndaǵy kıiz úı jasaıtyn kásiporyn qyzmetkerleri tapsyrys tússe, aıyna 5-ten 20-ǵa deıin kıiz úı jasaýǵa múmkindikteri bar. Bul etnoónimderdiń 20-30 paıyzy Reseıge jóneltiledi. Ásirese, kedendik kedergiler joıylǵaly Reseıdiń Chelıabi, Qorǵan, Túmen oblystarynan suranys kóbeıgen. Joldybaı Bazar. Derekkóz: «24kz». Foto: «24kz».