Atyraý munaıshylary balalar shyǵarmashylyǵyna qoldaý bildirdi
Ár bala ashylmaǵan bir álem sekildi. Olardyń árqaısysynyń ózindik talanty bar. «Bulaq kórseń, kózin ash» degendi halqymyz talantty balalardy qoldaýǵa baılanysty aıtqan-aý, sirá. Atyraýdaǵy otandyq munaı-gaz ónerkásibiniń qarashańyraǵy – «Embimunaıgaz» aksıonerlik qoǵamy bıyl alǵash ret munaıshylar balalary arasynda «Meniń baqytty balalyq shaǵym» atty shyǵarmashylyq baıqaý uıymdastyrdy. Bul baıqaýǵa jeti men on jas aralyǵyndaǵy 36 balǵyn qatysyp, árqaısysy ózderiniń talantyn ár qyrynan kórsetti.
«Embimunaıgaz» AQ bas dırektorynyń óndiris jónindegi orynbasary Súleımen Shotyqbaevtyń aıtýynsha, balalardyń shyǵarmashylyq baıqaýyn uıymdastyrýdaǵy basty maqsat – jas talanttardy taýyp, olardyń taýdaı talabyn ushtaýǵa qoldaý bildirý. Osy ıgi maqsatty kózdegen kásiporyn basshylyǵy tarapynan qurylǵan qazylar alqasyna balalar óz eńbekterin «Meniń týǵan jerim», «Meniń dosym», «Men turatyn kóshe» taqyryptarynda kórkem shyǵarma, óleń jáne fotoóner janry túrinde usynypty. Máselen, Isataı aýdanynyń Aqqystaý aýylyndaǵy Abaı orta mektebiniń birinshi synybyn úzdik aıaqtaǵan Amaner Aron «Týǵan jerim men elim, dostyq týraly oıymdy úsh shýmaq óleńge syıǵyzdym. Bul meniń tyrnaqaldy shyǵarmam bolsa da qazylar alqasy joǵary baǵalady. Bálkim, bolashaqta osy talabymdy ári jalǵastyratyn shyǵarmyn», deıdi. Amanerdiń ákesi de, anasy munaı salasynda eńbek etedi. О́zi de bolashaqta munaıshy mamandyǵyn ıgerip, eldiń órkendeýine úles qosýdy maqsat tutady eken.
Amanerdiń aýyldasy Janerke Kúnshyǵar da el ekonomıkasyna «qara altyndaı» tabıǵı baılyqty ıgerýmen laıyqty úles qosyp júrgen munaıshy áýletinde dúnıege kelgenin maqtan etedi. Atasynyń munaıshylyq jolyn jalǵastyrǵan ákesi men sheshesiniń eńbekqorlyǵyn úlgi tutatyn Janerke óz shyǵarmasyna qazaqtyń ulan-ǵaıyr dalasyn aq bilektiń kúshimen, aq naızanyń ushymen qorǵaǵan babalar amanatyna adaldyq tanytyp, tabıǵı baılyqty el ıgiligine jaratýdyń mańyzyn ashyp kórsetken. Taǵy bir talapty óren Jadyra Qýandyq óziniń Móldir esimdi dosy týraly oıyn móldiretip qaǵazǵa túsiripti. Bala kúnnen shynaıy dostyqtyń qadirin túsingen Jadyra Móldirdeı qurbysynyń bııazy minezine, qınalǵan janǵa qolushyn sozýǵa umtylyp turatyn meıirbandyǵyn kópke úlgi etkisi keledi. Al Aqerke Ábishqyzy ózi turatyn aýyldyń jasyl jelekke kómkerilgenin qalaıdy. Ol bul armanyn kópshilikke ortaq problema retinde kóterip, tabıǵatty aıalaýǵa, qorǵaýǵa shaqyrady.
Baıqaýǵa qatysqan balalardyń bir toby jas erekshelikterine qaramastan, munaıly Atyraýdyń kúndelikti tynys-tirshiligi men tabıǵatyn qylqalamynan týyndaǵan eńbekterine arqaý etipti. Munaıly óńirdiń búgingi kelbetin qas-qaǵym sátte fotoapparat obektıvine ilgen balalar jáne bar. Munyń bári árıne, qazylar alqasynyń nazarynan tys qalǵan joq. Balalardyń shyǵarmalaryn saralaǵan qazylar alqasy «Úzdik týyndy» nomınasııasyn balalardyń jas erekshelikterine oraı úsh topta anyqtady. Nátıjesinde «Úzdik týyndynyń» birinshi júldesi Jadyra Qýandyqova, Dýman Ernazaruly men Aıdyn Kitapqalıǵa berilip, olarǵa noýtbýk syıǵa tartyldy. Al ekinshi júldege ıe bolǵan Aıan Rahmetqalı, Aqerke Ábishqyzy men Nursultan Musaǵa fotoapparat berildi. Úshinshi júldeniń ıeleri Amaner Aron men Dınara Músilim jáne Meıirbek Tóreǵalıevtar planshettiń ıesi atandy. Bulardan bólek Janerke Kúnshyǵar, Ásem Ánýarova, Altynbek Jaınarbekov, Dınaz Jaqanova jáne Juldyz Ásemovanyń shyǵarmashylyq qabiletteri «Jaqsy jumys» nomınasııasynda arnaıy júldemen atalyp ótti.
Balalardyń erkin shyǵarmashylyqqa talpynysyna kásiporyn basshylary beıjaı qaraǵan joq. Sol sebepten bolar, «Embimunaıgaz» bul baıqaýdy endi jyl saıyn ótkizýge uıǵarym jasap otyr. Sóıtip, aldaǵy jyldan bastap, shyǵarmashylyq baıqaýǵa tek munaıshylardyń ǵana emes, ózge kásip ıeleriniń talantty balalaryn qatystyrý da qarastyrylmaq. Kásiporyn bas dırektorynyń orynbasary Rysty Tasmaǵambetova shyǵarmashyl balalardyń taýdaı talabyn «Balalardyń óz oılaryn erkin bildirýi, jan-jaǵynda bolyp jatqan qubylystarǵa baǵa berýge talpynýy, otansúıgishtik, dostyq pen yntymaqty shyǵarmalaryna arqaý etýi qýantady. Keıbiri óńirdegi ótkir problemalarǵa kópshilik nazaryn aýdarýǵa tyrysty. Bul – bizdiń ortamyzda otanshyl, belsendi býyn ósip kele jatqanynyń aıǵaǵy», dep baǵalady.
Otandyq munaı óndirýshi kásiporyn jyl saıyn balalardyń jazǵy demalysyn uıymdastyrýǵa qoldaý bildirip keledi. Máselen, jaqyn arada munaıshy otbasylarynyń 1000-nan astam balasyn Almaty jáne Kókshetaý óńirlerindegi jazǵy lagerlerde demaldyrý kózdelip otyr. Sonymen qatar, 1200 balany kórshiles Reseı men Túrkııadaǵy saýyqtyrý oryndaryna jiberýdi oılastyrǵan «Embimunaıgazdyń» bul qadamynan ózge kásiporyndar úlgi alsa deımiz.
Joldasbek ShО́PEǴUL,
«Egemen Qazaqstan».
Atyraý oblysy.
