Qordaǵy qazynalar

Qazaqtyń qazynasyn kórgende talaı jurttyń aýyzynyń sýy qurıdy. Mendeleev tablısasyndaǵy elementterdiń bári tabylatyn jerasty baılyǵy ushan-teńiz. Biraq biz ony aıtyp otyrǵan joqpyz. Ol baılyqtan da zor qazyna bar, aǵaıyn. Jaqynda sol qundylyqty árkimniń ózi baryp tamashalaýyna múmkindik týǵyzylyp otyr.  Astana qonaqtary men elordalyq turǵyndarǵa «Astana Opera» memle­kettik opera jáne balet teatry maýsym aıynda erekshe bir baǵaly syı ázirlep otyr. Teatr murajaıy qorynan «Sahna shejiresi» atty kórmege keremet buıymdar qoıylmaq. Sonshama eleń etkizetindeı bul qandaı shara? Mysaly, aty ańyzǵa aınalǵan dás­túrli ánshi Ǵarıfolla Qurmanǵa­lıev­tiń esimin estigenimiz bolmasa, ózin kórgen emespiz. Sol sııaqty, kúni keshe dúnıeden ozǵan Roza Baǵ­lanova, Ermek Serkebaev, Ázirbaıjan Mámbetov, Erkeǵalı Rahmadıev, Roza Ja­manova Myńjasar Mańǵytaev, Dáýren Ábirov sııaqty árqaısysy bir-bir taý tulǵa­lar týraly keıingi jas urpaq óte kóp nárse bilgisi keledi. Bul tizim ary qaraı Sara Kósherbaeva, Baqyt Áshimova, Vası­lıı Iаkovenko, Sultan Baısultanov, Bıbi­gúl Tólegenova, Narıman Qarajigitov, Áli­bek Dinishev, Qorlan Qalılambekova, Rahıma Jubaturova, Nurjamal Úsenbaeva, Gúljan Tutqybaeva, Maıra Muhamedqyzy, Jámıla Baspaqova bolyp jalǵasyp kete barady. Álgi kórmege aty atalyp otyr­ǵan ártisterdiń kıgen tarıhı teatrlyq kostıým­d­eri men túrli fotolary, murajaı dúnıeleri qoıylmaq. Álemdik deńgeıdegi teatrlar tájirıbesinde jıi kezdesetin mundaı joba budan bylaı otandyq teatrdyń da dástúrli ónegesine aınalyp, ótkenge, tarıhqa degen úlken qurmet pen izetti qalyptastyrmaq. «Astana Opera» murajaıynyń meń­gerý­shisi Aprıza Qusaıynovanyń aıtýynsha, bul úshin kóp ter tógýge týra kelgen ári munshama mol qazynany jınaýdyń ózi ońaıǵa túspegen. «Kostıýmder, turmystyq buıymdar, jumys quraldary ártisterdiń ómiri men ónerinen syr shertip qana qoı­maıdy, sonymen qatar olar týraly jan-jaqty maǵlumat alýǵa bolatyn estelikke, shejire-jádigerge toly. Bul zattardyń árqaısysynan ótken kúnder belgisin seziný qıyn emes. Búginde Qazaqstannyń túkpir-túkpirinen opera men baletke baılanysty barlyq tarıhı eksponattar jınalýda. Oǵan qanshama adamdar qamtylýda. «Teatr qory úshin kostıýmderdi, murajaı qu­jattaryn, fotomaterıaldardy jı­­nastyrýdy bıylǵy jyldyń aq­panynda qolǵa aldyq. Abaı atyndaǵy opera jáne balet teatry mundaǵy áriptesterine Qazaqstannyń opera jáne baletiniń belgili tulǵalary beınelengen 11 kartınany jáne asa kórnekti ártisterimizdiń sahnada kıgen kostıýmderin qurmetpen syıǵa tartty. Biz tek jekelegen solısterdiń dúnıesin ǵana emes, jalpy osy salanyń qalyptasýyna atsalysqan qaıratkerler jaıynda qyzyqty maǵlumattardyń birin qaldyrmaı jınaýdy maqsat etip otyrmyz. Búginde qorymyzda 21 teatrlyq kostıým men myńnan astam fotomurajaı qundylyqtary saqtaýly. Alda kútip turǵan jumystar áli de shashetekten», – deıdi murajaı meńgerýshisi. Kórmege kelýshiler úshin «Astana Opera» sahnasynda Qazaqstannyń halyq ártisteri men basqa da tanymal opera jáne balet juldyzdary ónerinen tamasha tartýlar ázirlenýi óskeleń urpaqqa taǵylymdy mura bolyp qalary sózsiz. Jetiqara QOŃYR. ASTANA. Sýretti túsirgen Erlan Omarov.