Investısııalyq ahýaldy jaqsartatyn qadam

Qazaqstan Prezıdenti janyndaǵy Ortalyq kommýnıkasııalar qyzmetinde Senat depýtaty Ikram Adyrbekovtiń qatysýymen brıfıng uıymdastyryldy. Brıfıng aıasynda Eýrazııalyq ekonomıkalyq odaq qurý týraly shartqa qol qoıylýyna baılanysty aldaǵy ýaqytta júzege asyrylatyn ıntegrasııalyq úderister týrasynda áńgime qozǵaldy. Senat depýtaty óz sózinde Táýelsizdiktiń alǵashqy jyldarynan bastap el Prezıdenti kórshi eldermen yntymaqtastyq pen áriptestikti damytýdy el saıasatynyń negizgi basymdyǵy retinde aıqyndap bergenine toqtaldy: «Elbasy 1992 jy­ly qazan aıynda BUU Bas Assam­bleıasynyń minberinen alǵash ret sóz sóılegen kezde Eýra­zııa­daǵy ekonomıkalyq keńis­tik­ti qaıtadan jandandyrý kerek­tigine nazar aýdarǵan bolatyn. Mine, búgingi tańda bul ıdeıa, osy usynys naqty túrde iske asty. Prezıdenttiń turaqty usta­ny­myna sáıkes, óńirlik ıntegrasııa eldiń tek ekonomıkalyq múddesin ilgeriletýge  jáne damytýǵa baǵyttalatyn bolady», dedi I.Adyrbekov. Onyń aıtýynsha, Qazaqstan – halyq­aralyq naryqqa teńiz arqy­ly shyǵatyn joly joq el bolyp tabylatyndyqtan, ishki sha­ǵyn naryq eldiń ekonomı­kalyq, resýrstyq, tranzıttik áleýe­tin tolyq ashýǵa, paıdalanýǵa múmkindik bermeıdi. Al Eýra­zııa­lyq ekonomıkalyq odaq bız­nestiń órisin keńeıtip qana qoı­maı, Qazaqstannyń 170 mln. halqy bar naryqqa shyǵýyna múmkindik týǵyzady. Depýtat, sondaı-aq, mem­le­kettiń pármendi, belsendi ekono­mıkalyq saıasatynyń nátıjesinde óndiristik ınfraqurylym qu­rylyp, qalyptasqanyn, osynyń ná­tıjesinde eski óndiris oryndary qaıtadan jańartylyp, búginde elimizdiń barlyq óńirinde jańa kásiporyndar salynyp jatqanyn tilge tıek etti. «Osynyń negizinde elimizde qysqa merzim ishinde jańa kásipkerler, bilimdi, bilikti menedjerler toby paıda boldy. Bıznes tolyqtaı aıaǵynan turdy. Demek, endigi kezekte ınte­grasııa kórshi eldermen teń ekonomıkalyq yqpaldastyq pen yn­ty­maqtastyqqa barýǵa múmkin­dik ashatyn bolady. Jalpy, Eýrazııalyq ekonomıkalyq odaq  –  óndiris salasyn damytýdyń, otandyq taýardy satý naryǵyn keńeıtýdiń, ulttyq bıznestiń básekelestik áleýetin arttyrýdyń jańa múmkindigi. Qazirgi tańda Dúnıejúzilik saýda uıymyna kirýge qatysty jumystar qar­qyndy túrde júrgizilýde. Demek, Qazaqstannyń osy uıymǵa múshe bolýǵa tolyqtaı múmkindigi bar», dedi ol óz sózinde. Brıfıng aıasynda Senat depýtaty shıkizattyq emes salany qarqyndy damytý úshin ınvestorlarǵa qoldaý kórse­tilip, jańa múmkindikter qaras­ty­ry­latynyn da atap ótti. «Parlament osy sessııanyń aıaǵyna deıin ın­vestısııalyq klımatty jaq­sartýǵa baǵyttalǵan jańa zań qabyldaıtyn bolady.   Máselen, ma­mandardyń zertteýinshe, Qazaq­standaǵy ınvestısııalyq ahýal kásipkerlerge salynatyn salyq jaǵynan bolsyn, zań ta­rapynan kórsetiletin jeńil­dikter jaǵynan bolsyn, memleket tarapynan kórsetiletin qol­daý-kómek pen sýbsıdııalar jaǵynan bolsyn, Belarýs pen Reseımen salystyrǵanda tartymdy. Qazirgi kúnniń ózinde bizdiń kásipkerlerimiz osyndaı qoldaý-kómektiń nátıjesinde 18-20 paıyz esebinde artyqshylyqqa ıe bolýda», dedi depýtat. «Árı­ne, bul uzaq  –  merzimdi joba. Qol qoıǵan sharttyń úsh eldiń par­la­mentterinde bir kezeńde qaralýy, ratıfıkasııadan ótýi qarastyrylyp jatyr. Osyǵan baılanysty, zań jobasy qyr­kúıek aıynda Parlament Má­ji­lisiniń qaraýyna túsedi dep jobalap otyrmyz», deı kelip I.Adyrbekov osy zań jobasyn tal­qylaý kezinde depýtattardyń bul jumysqa sarapshylardy, maman­dardy tartýǵa da múmkindigi bar ekenin jetkizdi. Láıla EDILQYZY, «Egemen Qazaqstan».