Ulytaý aýylynyń tirek mektebi óńirdiń úzdigi atanýdy maqsat etip otyr

Joba bilim berý sapasyn arttyrýǵa, aýyl mektepterine úzdik pedagogıkalyq tájirıbeler men tıimdi ádistemelerdi transfertteýge jáne tirek mektepterdiń qajetti materıaldyq-tehnıkalyq bazasymen qamtamasyz etýge baǵyttalǵan. Mektep 17 aýyldyq mektepti zamanaýı jabdyqtarmen qamtamasyz etý jobasynda altynshy boldy.

«Qazirgi tańda mektebimizde tamasha nátıjelerge qol jetkizip, óńirdegi úzdikterdiń qatarynan tabylý úshin barlyq jaǵdaı jasalǵan dep aıta alamyn. Jobanyń arqasynda bizdiń oqýshylarymyz zamanaýı zerthanalarda jaratylystaný ǵylymdaryn zerdeleýge, jabdyqtalǵan sheberhanalarda jańa tehnologııalardy taldaýǵa, kásibı telestýdııada áleýmettik rolıkter túsirýge jáne t.b. múmkindik aldy. Sonymen qatar, biz muǵalimderdiń bilim-biliktiligine erekshe nazar aýdaramyz. Mysaly, «Aýyldyq aımaqtarda tirek mektepteriniń áleýetin arttyrý» birlesken jobasy aıasynda «Nazarbaev Zııatkerlik mektebi» bazasynda muǵalimderdiń tájirıbeden ótý baǵdarlamasy iske qosyldy. Demek, elimizdiń úzdik oqý ornynyń tájirıbesin paıdalanyp, eń myqty materıaldyq-tehnıkalyq bazasy bar mektep retinde bolashaqqa degen órshil jospar quryp otyrmyz», deıdi mektep dırektory Tólegenova Janar Beısenqyzy.

Joba aıasynda 34 oqý kabınetteri, STEM laboratorııa, logoped, art-stýdııa, sheberlik klasstary ashylǵan. Sondaı-aq aldaǵy ýaqytta basqa da mekteptermen onlaın tájirıbe almasýǵa múmkindik beretin telestýdııa jasaqtalǵan.

Qarjylaýndyrý «Qazaqstan Halqyna» qory tarapynan júrgizilip, oǵan 249 825 000 teńge bólindi. Beeline Kazakhstan kompanııasy joba donory retinde tanylady.

Bilim berýdi turaqty damytý qorynyń jáne joba seriktesi «Nazarbaev Zııatkerlik mektebi» mamandarynyń kúshimen mekteptegi bilim berý ortasy men oqytý sapasyn taldaý boıynsha jumystar júrgizildi. Taldaý nátıjeleri negizinde mektepti damytý, bilim berý sapasyn arttyrý boıynsha usynystar jasalyp, ustazdarǵa qajetti biliktilik arttyrý kýrstary belgilendi.

Pedagogıkalyq quramǵa arnalǵan qarqyndy oqytý baǵdarlamasy

2023 jyldyń aqpanyna deıin ótkiziledi. Alaıda baǵdarlama aıaqtalǵannan keıin de mektep 2025 jylǵa deıin úsh jyldyq ádisnamalyq súıemeldeýge kóshedi.

«Eń aldymen, Qazaqstan halqynyń basym bóligi aýyldyq jerde turatynyn umytpaýymyz kerek. Sondyqtan aýyl oqýshylary qala balalary sııaqty túrli múmkindikke ıe bolýy kerek. Búginde biz tirek mektepterdi damytýmen aınalysamyz, áıtkeni onsyz aýyl bilimin kóterý tipten múmkin emes. Joba qazir Qazaqstannyń 17 oblysyn qamtıdy, onda 13 000-ǵa jýyq bala oqyp, 2 000-ǵa jýyq muǵalim jumys isteıdi», deıdi Bilim berýdi turaqty damytý qorynyń dırektory Danııar Toqtarbaev.

Ulytaý mektebinde 400-ge jýyq bala oqıdy.

«Otbasymyzda úsh oqýshy bar. Bárimiz №1 mektepte oqımyz. Eger buryn kúnniń sýyǵy, ne kanıkýl bolsyn, sabaqqa barmaǵanymyzǵa qýansaq, qazir mektepke asyǵamyz. Úziliste oınaıtyn ústel tennısi, fýtbol sııaqty oıyndardan bastap, keń kitaphana, kireberiste jumsaq dıvandar qoıylǵan. Maǵan qatty unaıdy. Bizdiń ustazdardy eń myqty der em. Sondyqtan bolý kerek, sabaqty kúnde qyzyǵa oqı bergim keledi», deıdi aptyǵa altynshy synyp oqýshysy Beısaly Aızada.

Atap ótý kerek, shara «Ashyq esik kúnderi» formatynda ótti. Oǵan aýyldyń belsendi azamattary, jergilikti atqarýshy organ qyzmetkerleri, buqaralyq aqparat quraldarynyń ókilderi, joba demeýshileri men seriktesteri qatysty.