Elimiz jemqorlyqqa jol bermeıtin memleket qurýdy kózdep otyr, osyǵan oraı osy qylmysqa qarsy is-qımyl saıasatyn jan-jaqty júrgizip keledi. Ásirese sońǵy kezderi halyqaralyq standarttar negizinde qoǵamnyń atalǵan keselimen kúresý myqtap qolǵa alyndy.
Sybaılas jemqorlyqqa qarsy is-qımyl agenttigi Prevensııa qyzmetiniń basshysy Saıan Ahmetjanovtyń aıtýynsha, qazir memlekettik, kvazımemlekettik organdar, korporatıvtik, kommersııalyq sektorlar álemdik tájirıbede synalyp, sybaılas jemqorlyqqa qarsy kúreste tıimdi bolǵan ISO 37001 «Paraqorlyqpen kúres menedjmenti júıesi» halyqaralyq standartyn engizip keledi. Atalǵan standart sybaılas jemqorlyq táýekelderin barynsha azaıtýǵa múmkindik beredi. Bul standartty engizgen kez kelgen uıym «Parasatty kompanııa» mártebesine ıe bolady, sebebi mekemelerdegi komplaens qyzmetkerler jemqorlyqtyń aldyn alý is-sharalaryn júrgizip, ony boldyrmaýdyń áreketin jasaıdy. Sebebi olardyń qyzmeti mekemeniń ishki qujattaryn rettep, durys baǵytqa qoıyp, sybaılas jemqorlyqqa qarsy táýekelderdi tómendetýge baǵyttalǵan.
«Sońǵy eki jylda elimizde 185 sybaılas jemqorlyq qylmysy tirkeldi. 2021 jyly 89, osy jyldyń on aıynda 96 sybaılas jemqorlyq qylmysy anyqtaldy. Onyń basym bóligi – memlekettik baǵdarlamalardy júzege asyrý barysynda qarjy jymqyrý, para alý faktileri», dedi Saıan Ahmetjanov.
Al «Samuryq-Qazyna» qorynyń komplaens qyzmetiniń basshysy Dáýren Aqshalov: «Sybaılas jemqorlyq is-sharalaryn boldyrmaýdy eń aldymen, mekeme basshylary túsinip, qolǵa alýy qajet. Qazir elimizde 6118 sybaılas jemqorlyqqa qarsy komplaens qyzmeti bar. Onyń 345-i – ortalyq memlekettik, 5619-y jergilikti atqarýshy organda jáne 154-i ulttyq kompanııalarda jumys isteıdi. «Samuryq-Qazyna» qory jemqorlyq táýekelderi bar qyzmet túrlerinen bas tarta bastady. Máselen, bıyl bizder standartqa sáıkes kelmeıtin birneshe kompanııamen eńbek shartyn buzdyq», dedi.
Sonymen qatar S.Ahmetjanov komplaens ofıserler daıyndaýdyń mańyzyn atap ótti. Onyń aıtýynsha, komplaens ofıserler árbir mekemege qajet. «Uıymdardaǵy komplaens qyzmettiń 80 paıyzy sybaılas jemqorlyqtyń aldyn alýdy kózdeıdi, al qalǵan 20 paıyzy jazalaý sharalary», dedi ol.
Jalpy, kvazımemlekettik kompanııalarda sybaılas jemqorlyqqa qarsy komplaensti engizý boıynsha mindet 2019 jyldyń sońynan bastap zańnamalyq turǵydan engizilgen edi, onyń basty maqsaty – korporatıvtik adaldyq standarttarynyń saqtalýyn baqylaý.
