Parlament • 08 Jeltoqsan, 2022

Májilis janyndaǵy Qoǵamdyq palatanyń alǵashqy otyrysy ótti

Búgin Májilis Spıkeri Erlan Qoshanov Májilis janynan qurylǵan Qoǵamdyq palatanyń alǵashqy otyrysyna qatysty, dep habarlaıdy Egemen.kz.

Marjan TILEÝBEK

Jıyndy ashqan Májilis Tóraǵasy búginde elimizde Prezıdent bastamasymen azamattardyń memlekettik basqarýǵa qatysý múmkindikterin keńeıtetin aýqymdy saıası reformalar júrgizilip jatqanyn atap ótti. Osy oraıda bılik pen qoǵam arasyndaǵy ashyqtyq pen ózara senimge negizdelgen qarym-qatynastyń jańa saıası mádenıeti qalyptasýda jáne munda Parlamenttiń orny erekshe.

– Memleket basshysy qoǵamdyq pikirtalas áleýmettik jeliler men alańdarda emes, Parlament qabyrǵasynda bolýy qajet ekenin aıtqan edi. Buǵan Májilis janyndaǵy Qoǵamdyq palata septigin tıgizýi kerek. Dál osynda depýtattar qaraǵan zań jobalary azamattardyń ótinishterin eskere otyryp, táýelsiz, kásibı qoǵamdyq saraptamadan ótýge tıis, – dedi E.Qoshanov.

Májilis Tóraǵasy Qoǵamdyq palatanyń jurtshylyqpen tikeleı dıalog qurýyna, eń kóp talqylanyp jatqan máseleler boıynsha depýtattardyń halyqpen keri baılanys ornatýyna múmkindik beretinin aıtty.

Erlan Qoshanov palatanyń kún tártibi azamattardyń eń ózekti máselelerin eskere otyryp qalyptasýy kerek ekenine basa mán berdi.

Osyǵan oraı jumys josparyna Áleýmettik kodeks, jergilikti ózin-ózi basqarý, menshik ıeleriniń birlestigi, turǵyn úı-kommýnaldyq sharýashylyǵy, densaýlyq saqtaý jáne bilim berýdi damytý týraly zań jobalaryn engizýdi usyndy.

Saıası sholýshy, Qoǵamdyq palata tóraǵasynyń orynbasary Nıkıta Shatalov búginde qoǵamdyq-saıası keńistiktiń qarqyndy ózgerip jatqanyn atap ótti.

– Qazir ár adam óz múmkindikterine degen senimin joǵaltyp almaıtyndaı jumys isteýimiz kerek. Qoǵam, ásirese, jastar óte belsendi. Olar óz múddelerin bildirýdi, qoǵamdyq-saıası jumystardy júrgizýdi tez úırenedi. Qoǵamdyq palata da óz jumysynda osyny kórsetýi kerek, – dedi N.Shatalov.

Al saıasattanýshy Ǵazız Ábishev memlekettik sheshimderdi qabyldaý júıesiniń ózgerýine yqpal etetin qazirgi zamannyń syn-qaterlerine nazar aýdardy.

– Qazir máselelerdi aqyldasyp, keńesip sheshý tujyrymdamasynyń ózektiligi artyp keledi. Mundaı qoǵamdyq keńesterdi respýblıkadan bastap, óńirge deıin barlyq deńgeıde qurý qajettiligi ǵylymı túrde dáleldengen. Qoǵamdyq palata qysqa ýaqytta tarap ketpeı, uzaq jyldar boıy qyzmet etedi dep senemin, – dedi saıasattanýshy.

Jıynǵa qatysýshylar Qoǵamdyq palatanyń qyzmeti men josparlaryna qatysty óz usynystaryn aıtyp, sóz sóıledi.

Májilis depýtaty Juldyz Súleımenova «Qoǵamdyq baqylaý týraly» zań jobasynyń jumysyna toqtaldy.

Qoǵamdyq palatanyń quramyna 37 múshe – Májilis depýtattary, saıası partııalardyń, úkimettik emes uıymdardyń jáne sarapshylar qoǵamdastyǵynyń ókilderi kiredi. Onyń quramy alty aıda bir ret rotasııalaý arqyly jańartylyp otyrady.