Turmystyq qaldyqtar qalaı zalalsyzdandyrylady?

Prezıdent janyndaǵy Ortalyq kommýnıkasııalar qyzmetinde dástúrli brıfıng ótti. Basqosýdyń bul jolǵy qonaǵy Qorshaǵan orta já­ne sý resýrstary mınıstri Nur­lan Qapparov boldy.  «El Úkimetiniń qaýlysymen elimizdiń sý resýrstaryn basqarýdyń memlekettik baǵdarlamasyn iske asyrý jónindegi is sharalar jospary bekitildi. Bul qujat Elbasy Nursultan Nazarbaevtyń Qazaqstannyń sý resýrstaryn basqarý memlekettik baǵdarlamasyn bekitý týraly Jarlyǵyn iske asyrý maqsatynda ázirlendi. Jospardyń is-sharalary Memlekettik baǵdarlamada kózdelip, sý únemdeýge, sý resýrstaryn qosymsha ulǵaıtý jáne sý obektilerin basqarý júıesin jetildirýge baǵyttalǵan bes maqsatty ındıkatorlar boıynsha toptastyryldy», dedi Qorshaǵan orta jáne sý resýrstary mınıstri N.Qapparov. Jospardaǵy is-sharalardy júzege asyrý nátıjesinde 2700 shaqyrymnan astam magıstraldy jáne bólip taratý kanaldary qaıta jańǵyrtýdan jáne kúrdeli jóndeýden ótkizilip, 29 jańa sý qoımasy salynbaq. Únemi sýarylatyn 400 myń jáne shabyndyq tásilmen sýarylatyn 100 myń gektar alqaptardaǵy gıdromelıorasııalyq júıeler jańartylyp, qaıta jańǵyrtylady. Jýyrda Úkimet Qazaqstanda turmystyq qatty qaldyqtardy basqarý júıesin jańǵyrtý baǵdarlamasyn qoldady. Mundaǵy maqsat turmystyq qatty qaldyqtardy basqarý salasynda kórsetilgen qyzmetter kesheniniń tıimdiligin joǵarylatý, ekologııalyq jáne áleýmettik turǵydan qolaıly etý bolsa, turmystyq qaldyqtardy óńdeý úlesin ulǵaıtý men olardyń qaýipsiz kómilýin qamtamasyz etý de osy qatarda. Sondaı-aq, osynyń bári «jasyl» qaǵıdattar talaptaryna sáıkes júıeli túrde júrgizilmek. Sonymen birge, baǵdarlamanyń negizgi bólimderiniń biri óndirýshiniń keńeıtilgen jaýapkershiligi normalaryn engizý bolyp tabylady. Taýar jáne qaptama óndirisiniń nemese ımporttaýshynyń olardy paıdalanǵannan keıin túziletin qaldyqtardy jınaý jáne qaıta óńdeýdi júzege asyrý mindettemesin zańnamalyq turǵydan bekitý qajet. Atalǵan min­detterdi qoldaý sharalaryn engizbeı iske asyrý múmkin emes. Baǵdarlama mindetterin oıdaǵydaı oryndaý men jeke sektordy jumyldyrý úshin birqatar qoldaý sharalary kózdelgen. Memlekettik jáne jeke taraptardyń qyzmetterin úılestirý men tyǵyz qarym-qatynasyn ornatý maqsatynda mınıstrliktiń qazirgi enshiles kompanııa­sy «Jasyl Damý» AQ negizinde TQQ basqarý boıynsha biryńǵaı ortalyǵy qurylmaq. Qazirgi tańda elimizde ákimdik, ınvestor jáne qoqys shyǵaratyn kompanııa arasyndaǵy kelisimsharttar ózara qatynastardy rettemeýi nátıjesinde qoqys óńdeıtin zaýyttar toqtap qalýda. Atqarylǵan jumystarǵa keler bolsaq, elimizdiń 9 qalasynda TQQ basqarý boıynsha ınvestısııalar tartý jumystary bastalǵan. Aqtaý jáne Qaraǵandy qalalarynda jobalardy iske asyrý jumystary bastalyp ta ketken. Ábdirahman QYDYRBEK, «Egemen Qazaqstan».