Qazaqstan • 09 Jeltoqsan, 2022

«Altyn dombyra»: Túrkistanda alaman aıtys bastaldy

Túrkistanda «Altyn dombyra» respýblıkalyq aqyndar aıtysy bastaldy. Eki kúnge josparlanǵan dúbirli doda ult ustazy Ahmet Baıtursynulynyń 150 jyldyǵyna oraılastyrylyp otyr, dep jazady Egemen.kz.

Dınar KERIM

Alamannyń ashylýynda sóz sóılegen «AMANAT» partııasynyń Tóraǵasy Erlan Qoshanov el birliginiń jáne ult tutastyǵynyń máni men mańyzyna toqtalyp, osy jolda basyn báıgege tikken Ahmet Baıtursynulynyń aıryqsha róli men eren eńbegin atap ótti.

«Kıeli Túrkistan topyraǵynda alaman aıtystyń shymyldyǵyn ashyp otyrmyz. «AMANAT» partııasy rýhanııat pen mádenıetke jan-jaqty qamqorlyq jasap keledi. Sonyń bir aıǵaǵy – ultymyzdyń boıtumaryna aınalǵan osy aıtys», dedi Erlan Qoshanov.

Árıne, jahandaný dáýirinde ult bolmysyn, onyń dara dástúrin, qaımaǵy buzylmaǵan tól ónerin saqtap qalý ońaı emes. Bul rette, «AMANAT» partııasynyń Saıası tuǵyrnamasynda ulttyq ónerimiz keńinen nasıhattalyp, oǵan jan-jaqty jaǵdaı jasalatyny aıqyn jazylǵan.

«El Prezıdenti Qasym-Jomart Toqaevtyń bastamasymen elimiz jańa dáýirge, ádiletti Qazaqstanǵa qadam basty. Qoǵam ózgerip jatyr. Osy oń ózgeristerdi bolashaqqa aqyndarymyz jetkizedi dep oılaımyn. Búgin oramdy oılardy, ataly sózderdi estımiz degen senimdemin», dep atap ótti Erlan Qoshanov.

Partııa tól tarıhymyzdy dáripteý, rýhanııatymyzdy jańǵyrtý baǵytyndaǵy bastamalardy ári qaraı da jalǵastyra beredi. Osy ýaqyt aralyǵynda saıası uıymnyń tikeleı qoldaýymen elimizde 100-ge jýyq respýblıkalyq aqyndar aıtysy uıymdastyryldy.

О́z kezeginde, aıtystyń tizginin ustaǵan aqyn, Májilis depýtaty Amanjol Áltaı búgingi urpaq uly tulǵanyń kemeńger oılary arqyly tárbıelenetinin jetkizip,kóziqaraqty kórermenge qazylar alqasynyń quramy men synǵa túsetin aqyndardy tanystyrdy.

Osylaısha, túrki áleminiń rýhanı astanasynda ótip jatqan sóz saıysynda qazylar alqasyna kórnekti óner qaıratkeri, Qazaqstannyń Halyq ártisi, Memlekettik syılyqtyń ıegeri – Asanáli Áshimov tóraǵalyq etedi. Sonymen qatar, qazylar alqasynyń quramynda aqyn, Abaı atyndaǵy ádebıet pen óner salasyndaǵy memlekettik syılyqtyń ıegeri Ǵalym Jaılybaı, Senat depýtaty Nurtóre Júsip, aqyn, «Otan» ordeniniń ıegeri Svetqalı Nurjan,Májilis depýtaty Janarbek Áshimjanov, aqyn, Qazaqstan Jazýshylar odaǵy Astana qalalyq fılıalynyń dırektory Dáýletkereı Kápuly, «Altyn dombyra» ıegeri Bekarys Shoıbekov,aqyn, Qadyr Myrza Áli atyndaǵy Batys Qazaqstan oblystyq «Mádenıet jáne óner» ortalyǵynyń dırektory Baýyrjan Qalıolla syndy mádenıet jáne tarlandary bar.

Alash ardaqtysy Ahmet Baıtursynulynyń 150 jyldyǵyna oraı uıymdastyrylyp otyrǵan sóz barymtasynda elimizdiń túkpir-túkpirinen kelgen 18 aqyn ózara baq synaýda. Olardyń arasynda «Altyn dombyra» ıegeri Rústem Qaıyrtaı, halyqaralyq, respýblıkalyq aıtystarda top jaryp júrgen Tólegen Jamanov, Erkebulan Qaınazarov, Birjan Baıtýov jáne t.b. aqyndar bar. Al kil myqtydan kim myqty shyǵary aqtyq synda anyqtalady.