Taýyqtan tabys taýyp otyr

Eńbekke ebi bar adam kásiptiń kózin de tabady. Kózin tapqan soń tabys ta túsedi. Ramazan Mahanov 125 myń teńgege ınkýbator qurylǵysyn satyp alǵany kóktemde ǵana edi, jazdaı balapan satyp, aqtap aldy. Aqtaǵandy qoıyp, paıda kóre bastaǵan. Kásipker densaýlyǵym syr berdi dep, jambastap jatqan joq. Kúndelikti tirligi bar. Tań ata asyl tuqymdy taýyqtaryn ashyq qoraǵa shyǵaryp, jemin shashady, sýyn qoıady. Asyl tuqymdy taýyqtarynyń biri etti bolsa, endi biri jumyrtqa tabý úshin jaralǵan. Ettisi – broıler. Bitimi iri. Qoregi jaqsy bolsa, salmaǵy bes kılogramǵa deıin baratyn kórinedi. Tapsyrysqa qaraı, soıyp sata beredi. Jumyrtqaǵa tipten suranys kóp eken. Aıtýynsha, keıbir kezderi ınkýbatorǵa jumyrtqa jetkize almaı qalady. Inkýbator demekshi, memleketten 580 myń teńge qaıtarymsyz grant alǵan Ramazan Mahanov bıznes bastaý úshin 125 myń teńgesine ınkýbatorǵa qol jetkizgenin joǵaryda aıttyq. Al qalǵan somaǵa asyl tuqymdy taýyq, jem-shóbin, dárýmenderin alǵan. Aıtqandaı, memleket jaı ǵana grant bere salmaǵan. Aldymen kásip bastaımyz degen azamattardy arnaıy kýrstan ótkizip, bilimderin shyńdaǵan. Jobalaryn kórgen. Sodan keıin ǵana qoldaý kórsetken.

– Sharýam jaman emes. Buǵan deıin de qoldan ınkýbator jasap, balapan shyǵaryp júrgem. Al mynaý jańa apparat ónimdi eken. Bir basqanda 500 jumyrtqa basýǵa múmkindigi bar. Biraq men toltyryp sala almadym. Suryp­tap, jumyrtqa jınaý qıyndaý boldy. Sa­tylyp ketedi. Únemdep júrip, 400-deı ba­la­pan shyǵardym. Ishinde qaz-úırek te bar. Sha­rýam bir kúnge de tura­lap qalǵan joq. Ta­ýyq­qa da, jumyrtqaǵa da suranys joǵary, – deıdi taýyqtan tabys tapqan Ramazan Mahanov.

Kásipkerdiń aıtýynsha, salǵan jumyrt­qany durys baptasa 80 paıyzy shyǵady eken. Bul jaman kórsetkish emes. Baptaý­dyń da ádis-tásili bar. Inkýbator quryl­ǵy­syn ashyp, sýytady, sý sebedi taǵy­syn taǵy. Sóıtip, 21 kúnnen keıin taýyq­­tyń bala­pandary jaryp shyǵa bastaıdy. Al úı­rektiń balapany 30 kúnnen soń shy­ǵady. Baıqaǵanymyz, taýyq baǵyp, jumyrt­qa satýdan túsetin paıda az emes sekildi. Álbette, eńbektený kerek.

Abaı oblysy,

Kókpekti aýdany  

Kókpekti aýdany