«Sizderdi I Ortalyq Azııa medıa forýmynyń ashylýymen quttyqtaımyn! Buqaralyq kommýnıkasııalar qarqyndy damyǵan qazirgi zamanda medıa salasynda tájirıbe almasý jáne óńirdegi mádenı-gýmanıtarlyq yntymaqtastyq aıasyn keńeıte túsý asa mańyzdy. Aımaqtaǵy tanymal jýrnalısterdiń, sarapshylar men medıa menedjerlerdiń basyn qosqan forým mamandardyń kásibı paıymdaryn birlese talqylaýǵa múmkindik beretin biregeı pikirtalas alańy. Osy ólkedegi memleketterdiń jan-jaqty yqpaldastyǵy baýyrlas halyqtardyń baı tarıhy men ortaq murasyna negizdelgen. Bıyl aǵaıyn elderdiń arasynda dıplomatııalyq qarym-qatynas ornaǵanyna 30 jyl tolyp otyr», delingen Prezıdent quttyqtaýynda.
Budan soń, Memleket basshysy HHI ǵasyrda Ortalyq Azııany birlese damytýdy kózdeıtin dostyq, tatý kórshilik jáne yntymaqtastyq týraly shartqa qol qoıý rásiminiń osy mereıli jylda ótýiniń zor sımvoldyq máni týraly aıtqan.
«Biz jahandaný dáýirinde óńirlik aqparattyq keńistikpen shektelip qalmaýymyz kerek. Birlesken medıa ónimder jasap, ortaq qundylyqtardy halyqaralyq deńgeıde dáripteý asa mańyzdy. Sol arqyly Ortalyq Azııa elderiniń jasampaz ıdeıalary men jarqyn isterin álemge tanytamyz», delingen quttyqtaýda.
Búgingi forýmda Prezıdenttiń Ortalyq Azııa elderi týraly habar taratatyn ortaq telearna ashý jáne arnaıy saıt qurý týraly usynysy jeke talqylanady.
