Senatorlar qaraǵan zań jobasynyń biri «Qazaqstan Respýblıkasynyń keıbir zańnamalyq aktilerine Memleket basshysynyń jekelegen tapsyrmalaryn iske asyrý máseleleri boıynsha ózgerister men tolyqtyrýlar engizý týraly». Zań jobasyndaǵy normalar kóptegen saladaǵy máselelerdi sheshýge baǵyttalǵan. Atap aıqanda, óńirlerdiń qarjylyq derbestigin odan ári arttyrý úshin salyq túsimderiniń jekelegen túrlerin jergilikti bıýdjetke berý kózdelip otyr. Túzetýler memlekettik satyp alýdaǵy básekelestik ortany keńeıtýge jáne osy saladaǵy sybaılas jemqorlyq táýekelderin azaıtýǵa jaǵdaı jasaıdy. Zań jobasy monopolııa operatorlaryn retteý mehanızmin qaıta qaraýdy jáne memlekettik-jekemenshik seriktestikti iske asyrý tásilderin jetildirýdi de qamtıdy.
Jalpy senatorlar zań jobasyn qoldady. Alaıda qujatty qaraý barysynda depýtattar oǵan birqatar ózgertý engizýdi usyndy. Soǵan baılanysty senatorlar usynǵan túzetýler engizilip, zań jobasyn Májiliske qaıtarý týraly sheshim qabyldandy.
«Memleket basshysynyń tapsyrmasyna sáıkes elge 2022 jylǵy 1 qyrkúıekke deıin ákelingen rýli oń jaqta ornalasqan avtokólikter boıynsha bastapqy tirkeý múmkindigin berý usynyldy. Bul 20 myńǵa jýyq azamatymyzǵa óz kólikterin zańdastyrýǵa múmkindik beredi. Sondaı-aq senatorlar azamattardyń banktik, salyqtyq qupııasyna qol jetkizý máselelerine qatysty ýákiletti organdarǵa negizsiz keń ókilettikter beretin jekelegen erejelerdi alyp tastady. Osy zań qabyldanǵannan keıin halyqtyń ál-aýqatyn jaqsartýǵa oń áserin tıgizedi dep senemiz», dedi Máýlen Áshimbaev.
Sonymen qatar otyrys barysynda «Qazaqstan Respýblıkasynyń keıbir konstıtýsııalyq zańdaryna ózgerister men tolyqtyrýlar engizý týraly» zań jobasy qaraldy. Senatorlar bul qujatqa sot júıesiniń jáne «Astana» halyqaralyq qarjy ortalyǵynyń qyzmetine baılanysty ózgertýler engizýdi usyndy. Nátıjesinde Senattyń túzetýleri engizilip, zań jobasy Májiliske qaıtaryldy.
Palata otyrysynda senatorlar ózderiniń depýtattyq saýaldaryn da joldady.
Olga Býlavkına óńirlerdegi energetıkalyq jabdyqtar men tazartý nysandarynyń ábden tozǵanyn aıtyp, alańdaýshylyq bildirdi. Senator energetıkalyq strategııany ázirleýdi, sondaı-aq qalalar men aýdandardyń káriz tazartý nysandaryn tozyǵy jetken ınfraqurylym aýdıti nysandarynyń tizimine engizýdi usyndy.
Ǵalıasqar Sarybaev Jetisý oblysynda jergilikti sharýalardyń jer ýchaskeleri jańa oblystyń qurylýyna baılanysty tıisinshe qaıta resimdelmegen jaǵdaıda, olar úshin memlekettik sýbsıdııalar qoljetimsiz bolyp qalýy múmkin ekenin aıtyp, másele kóterdi.
