Bıylǵy jyldyń qarasha aıynda respýblıkalyq bıýdjetten zeınetaqy tólemderine 245,9 mlrd teńge, onyń ishinde bazalyq zeınetaqyny tóleýge – 74,9 mlrd teńge, yntymaqty zeınetaqyny tóleýge – 171 mlrd teńge bólindi.
1 jeltoqsandaǵy jaǵdaı boıynsha Qazaqstanda zeınetkerler sany – 2 mln 276 myń adamdy qurady. Al zeınetaqy tólemderiniń ortasha mólsheri - 108 960 teńge.
«2018 jylǵy 1 shildeden bastap memlekettik bazalyq zeınetaqy tólemi zeınetaqy júıesindegi ótilin eskere otyryp, ár alýshyǵa jeke taǵaıyndalatynyn eske salamyz. Bul rette 1998 jylǵy 1 qańtardaǵy jaǵdaı boıynsha yntymaqty júıede jumys istegen ýaqyty, sondaı-aq mindetti zeınetaqy jarnalary tólengen kezeńder zeınetaqy júıesindegi eńbek ótiline qosylady. Eger azamattyń zeınetaqy júıesindegi ótili 10 jyl nemese odan az bolsa, sondaı-aq eger múlde joq bolsa, bazalyq zeınetaqy eń tómengi kúnkóris deńgeıiniń 54 %-yn quraıdy, sodan keıin 10 jyldan asqan ár jyl úshin onyń mólsheri 2 %-ǵa artady. Mysaly, eger sizdiń ótilińiz 20 jyl bolsa, bazalyq zeınetaqy tómengi kúnkóris deńgeıiniń 74 %-yn, al 30 jyl bolsa, onda 94 %-yn quraıdy. Eńbek ótili 33 jyl nemese odan kóp bolsa, kúnkóris deńgeıiniń eń joǵarǵy mólsherinde belgilenedi. Eger bir aı ishinde mindetti zeınetaqy jarnalary Biryńǵaı jınaqtaýshy zeınetaqy qoryna birneshe ret aýdarylsa, jınaqtaýshy júıege qatysý merzimi bir aıdy quraıdy», delingen vedomstvo habarlamasynda.
Osylaısha mindetti zeınetaqy jarnalary neǵurlym turaqty jáne tolyq kólemde aýdarylatyn bolsa, zeınet jasyna jetkende bazalyq zeınetaqy tólemderiniń mólsheri soǵurlym kóp bolady.
О́z kezeginde azamattyń jasyna baılanysty zeınetaqy tólemderiniń mólsheri 1998 jylǵy 1 qańtardaǵy jumys ótiline jáne zeınetkerlikke deıingi kezeńdegi ortasha aılyq tabysyna baılanysty bolady.
Yntymaqty zeınetaqylardyń mólsheri jyl saıyn ınflıasııa deńgeıinen 2% artyp kóterilýge kepildik beriledi, bul 2014 jyly qabyldanǵan zeınetaqy júıesin odan ári jańǵyrtýdyń 2030 jylǵa deıingi tujyrymdamasyna sáıkes keledi.
«2023-2025 jyldarǵa arnalǵan respýblıkalyq bıýdjet týraly» zańǵa sáıkes jasyna jáne eńbek sińirgen jyldaryna baılanysty zeınetaqy tólemderiniń mólsheri 2023 jylǵy 1 qańtardan bastap alynatyn mólsherden 10,5%-ǵa artady.
Memleket basshysy Qasym-Jomart Toqaevtyń tapsyrmasyn iske asyrý sheńberinde yntymaqty zeınetaqyny esepteý úshin qoldanylatyn eń joǵary tabys mólsherin 46-dan 55 AEK-ke deıin ulǵaıtý kózdelgen.
Memlekettik bazalyq zeınetaqy tóleminiń mólsheri kelesi jyly 40 567 teńgeni quraıtyn, ıaǵnı eń tómengi kúnkóris deńgeıiniń ulǵaıýyna baılanysty, sondaı-aq eń tómengi mólsherdiń eń tómengi kúnkóris deńgeıinen 54%-dan 60%-ǵa deıin ulǵaıýyna baılanysty arttyrylady.
Osylaısha, bazalyq zeınetaqy tólemin eskere otyryp, zeınetaqylardyń eń tómengi mólsheri 2023 jylǵy 1 qańtardan bastap 68 223 teńgeden (2022 jyly) 77 417 teńgege deıin artady.
