Memleket basshysyna bıylǵy kúrdeli makroekonomıkalyq jaǵdaılarǵa qaramastan bank sektorynyń turaqtylyǵy men ornyqtylyǵy qamtamasyz etilgeni jóninde baıandaldy. Mádına Ábilqasymovanyń aıtýynsha, bankterdiń aktıvteri jyl basynan beri 14,4 paıyzǵa ósip, 43,1 trıllıon teńgege jetken. Al halyqtyń salymdary 16,8 paıyzǵa nemese 15,7 trıllıon teńgege deıin kóbeıgen.
Sonymen qatar ekonomıkany kredıtteý isin yntalandyrý maqsatynda Agenttik kapıtal bosatýǵa jáne ótimdilikke qatysty retteý sharalaryn qabyldap, kepilzat saıasatyna qoıylatyn talaptardy jeńildetti. Nátıjesinde ekonomıkany kredıtteý kórsetkishi jyl basynan beri 20,1 paıyzǵa nemese 22,2 trıllıon teńgege deıin artty. Onyń ishinde bıznesti kredıtteý kólemi 7,3 paıyzǵa nemese 8,3 trıllıon teńgege deıin ósken, sondaı-aq shaǵyn jáne orta bıznesti kredıtteý kórsetkishi 8,6 paıyzǵa nemese 4,9 trıllıon teńgege deıin ulǵaıǵan.
Prezıdentke halyqtyń shamadan tys kredıt alýyn shekteý sharalary týraly aqparat berildi. Atap aıtqanda, mıkrokredıtterdiń syıaqy mólsherlemesi tómendetilip, borysh júktemesiniń koeffısıentin esepteý tásili qatańdatyldy. Sondaı-aq bankter men mıkroqarjy uıymdarynyń (MQO) problemalyq kredıttermen jumys isteý jónindegi jeke josparlary qabyldandy. Jalpy mıkroqarjy jáne kollektorlyq uıymdardyń qyzmetine qoıylatyn talap kúsheıdi. Bıyl 23 mıkroqarjy uıymy men 35 kollektorlyq agenttiktiń qyzmeti toqtatyldy.
Agenttik tóraǵasy naqtylaǵandaı, saqtandyrý naryǵynda jańa áleýmettik saqtandyrý ónimderi engizilip, saqtandyrý qyzmetterin sıfrlandyrý úshin jaǵdaı jasalǵan. Qor naryǵynda jeke sanattaǵy ınvestorlardy qorǵaý sharalary kúsheıtildi. Olardyń sany eki jylda 4 ese artyp, 526 myńǵa jetken.
Kezdesý sońynda Memleket basshysy qarjy naryǵyn retteý isin odan ári damytýǵa jáne osy salada turaqtylyqty qamtamasyz etýge baǵyttalǵan birqatar mindet júktedi.
