«2023 jyldyń saıası kún tártibin ótken jyldaǵydaı Prezıdent belgilegen saıası reformalar vektory aıqyndaıdy. Birinshi kezekte, bul el Konstıtýsııasyn jańartý jónindegi respýblıkalyq referendým qorytyndylaryn is júzinde iske asyrýdy kózdeıtin sharalarǵa qatysty bolmaq. Jyl basynan bastap múldem jańa ınstıtýt – Konstıtýsııalyq sot óz jumysyn bastaıdy. Ol adam quqyqtary jónindegi Ýákil men Bas prokýratýranyń jańa konstıtýsııalyq mártebesimen jáne halyqtyń áleýmettik osal toptaryn qoldaý jónindegi Ombýdsmenniń jańa laýazymyn qurýmen qatar azamattardyń irgeli quqyqtaryn qorǵaýdyń jańa júıesin jabady», dep jazdy Erlan Qarın Telegram-daǵy arnasynda.
Memlekettik keńesshi atap ótkendeı, 1 qańtardan bastap saılaý zańnamasy men saılaý júıesine qatysty birqatar jańa ózgerister kúshine enedi.
«Bir mandatty saılaý okrýgteri men tıisti saılaý komıssııalaryn qurý prosesi bastalady. Aýmaqtyq saılaý komıssııalarynyń músheleri endi óz ókilettikterin kásibı turaqty negizde júzege asyrady. Bul saılaý rásimderiniń sapasyn arttyrýǵa múmkindik beredi. Jańa jylda 2022 jyldyń kúzinde bastalǵan jańa saılaý sıkli jalǵasady. 14 qańtarda Parlament Senaty depýtattarynyń saılaýy ótedi, sodan keıin birinshi jartyjyldyqta saıası júıeni údemeli qaıta júkteýdiń prezıdenttik josparyna sáıkes Májilis pen barlyq deńgeıdegi máslıhattar depýtattarynyń kezekten tys saılaýy ótýi tıis. Aldaǵy saılaý naýqany múldem jańa erejeler men normalar boıynsha ótetinin atap ótken jón», deıdi ol.
Aıta ketsek, 2023 jyldan bastap aýdandar men oblystyq mańyzy bar qalalardyń ákimderin pılottyq rejımde tikeleı saılaý prosesi ótkiziletin bolady.
«Aýyl ákimderiniń korpýsyn jańartý jalǵasady. 350-den astam aýyl, kent jáne aýyldyq okrýg ákimderine tikeleı saılaý ótkizý kózdelip otyr. Bul saılaý myńnan astam aýyldyq eldi mekenderdi qamtıdy. Osylaısha aldaǵy jyl aldyńǵy jylmen salystyrǵanda ishki saıası oqıǵalarǵa toly bolýǵa ýáde beredi. Eń bastysy - prezıdenttik jańǵyrtý baǵdarlamasyn údemeli iske asyrý jalǵasýda. Bul 2023 jylǵy saıası kún tártibiniń negizi bolmaq», dep jazdy Erlan Qarın.
