Aýrýhananyń baspasóz qyzmetiniń habarlamasyna súıensek, 55 jastaǵy pasıent munda júrektiń ıshemııalyq aýrýy, turaqsyz stenokardııa dıagnozymen túsken. Aýrýhanaǵa jetkizilgen kezde keýde men júrek tusynyń qysylatynyn jáne ashyp aýyratynyn, sodan soń sol qolǵa beriletinin aıtyp shaǵymdanǵan. Sonymen qatar júregi aınyp, basy aınalyp, entigip qalatyn bolǵan.
«Aldymen biz fraksıondyq rezerv ádisin (FFR) paıdalana otyryp tamyr ishindegi qysymdy ólshedik. FFR nátıjesi tamyrdyń bolmashy ǵana tarylǵanyn kórsetip berdi. Stentteýge degen qajettilik joq degen sheshim qabyldandy. Sodan soń ýltradybystyq zertteýdiń kómegimen tamyrdyń ishin tekserdik. Nátıjesinde, júrek qarynshasynyń aldyńǵy bóligindegi kúretamyr qabyrǵasynda túıinshik bary anyqtaldy. Pasıenttiń júregine stent ornatý qajet boldy. Stent qoıylǵannan keıin naýqas birden kardıologııa bólimshesine aýystyryldy», dedi Intervensıondyq hırýrgııa bólimshesiniń meńgerýshisi Sáken Anartaev.
Tamyrishilik ýltradybystyq zertteý – koronarlyq arterııalar men ózge de qan tamyrlarynyń jaı-kúıin tekserý maqsatynda jasalatyn dıagnostıka túri. Tamyr ishin zertteý dıagnostıkalyq jáne terapevtik dıagnozdardy naqtylaý maqsatynda jasalady. Arnaıy qurylǵy tamyrdyń ishindegi ózgeristerdi baıqaýǵa múmkindik beredi.
Fraksıondyq rezerv kóbine koronarografııa kezinde nemese operasııadan keıin mıokard ıshemııasy qaýpiniń aldyn alý maqsatynda jasalady. Ol ornatylǵan stenttiń qanshalyqty durys bekitilgenine kóz jetkizip, emdeý taktıkasyn aıqyndaýǵa múmkindik beredi. Aıta keterligi, bul prosedýralardyń bári de mindetti áleýmettik medısınalyq saqtandyrý esebinen jasalady.
