«Jastar rýhy» Jastar qanatynyń ortalyq jáne aımaqtyq belsendileri kún saıyn qarttardyń aýlasyn qalyń qardan tazartýǵa kómek kórsetip júr. Olar muny mindetimiz dep sanaıdy. Bul úrdis jyl saıyn dástúrli túrde qaıtalanyp otyrady. Máselen, Aqtóbe oblysynyń jastary eki-úsh kúnde 300-ge jýyq qarttyń aýlasyn qardan tazalap bergen. Sonymen qatar óńirlerdegi jastar qala kóshelerin qardan tazartýǵa úlesterin qosyp keledi.
Al Qaraǵandy jastary osy kúnderi «Kel, shaı isheıik» is-sharasyn qolǵa alyp, aıazdy, borandy kúnderi dalada jumys istep júrgen kommýnaldyq qyzmetkerlerge ystyq shaı men táttiler usynyp júr. Qaıyrymdy iske barlyǵy 500-den astam belsendi qatysqan. «Sýyq kúnderi bir-birimizge jylý syılaıyq, dostar!», dep «Jastar rýhy» JQ Qaraǵandy oblystyq fılıalynyń ókilderi barlyq jas býyndy ıgi iske qatysýǵa shaqyrdy.
Osyndaı qaıyrymdylyq is-sharasy sheńberinde jastar til saıasatyn júrgizýge de úles qosýdy jón kórip, «Meniń elim – meniń tilim» respýblıkalyq jobasy aıasynda «Sóıle» tildesý úıirmesin iske qosty. «Jobanyń maqsaty – jastardy qazaq tilin úırenýge dáripteý jáne onyń áleýetin arttyrýdy nasıhattaý arqyly qoǵam arasynda tildiń qoldanys aıasyn keńeıtý», deıdi uıymdastyrýshylar.
Elimizdiń 12 aımaǵynan (Astana, Almaty qalalary; Abaı, Aqmola, Aqtóbe, Almaty, ShQO, BQO, Qaraǵandy, Qostanaı, SQO, Pavlodar oblystary) joba aıasynda qazaq tilin oqýǵa qulshynysy bar kez kelgen azamat «Sóıle» tildesý úıirmelerine qosyla alady. Aptanyń demalys kúnderi úıirmeler aımaqtardaǵy kovorkıng ortalyqtarda jumys isteıdi. Tildesý úıirmesi barysynda sondaı-aq dombyra úıirmeleri jáne ádebı-rýhanı keshter, túrli chellendjder uıymdastyrylmaq.
