Kezdesý barysynda M.Áshimbaev aldaǵy ýaqytta Senat óńirlerdiń múddesin bildiretin Palata retinde máslıhattarmen baılanysty odan ári arttyrýdy josparlap otyrǵanyn aıtty. Palata spıkeri óz sózinde osy taraptaǵy jumystyń naqty baǵyttary men formatyna keńinen toqtaldy.
«Zań shyǵarý isi aýqymdy ári keshendi prosess. Zańdardyń barlyq normalary aldyn ala jan-jaqty talqylanyp, pysyqtalady. Osy jumystarǵa máslıhat depýtattarynyń turaqty qatysýy aıryqsha mánge ıe. Sizder jergilikti jerlerdegi jaǵdaıdy jaqsy bilesizder. Sondyqtan zań shyǵarý isinde máslıhat depýtattarynyń oı-pikirleri men usynystarynyń mańyzy zor», dedi M.Áshimbaev.
Senat tóraǵasy Memleket basshysy Qasym-Jomart Toqaevtyń bastamasymen iske asyrylǵan konstıtýsııalyq reformanyń nátıjesinde máslıhattardyń róli artqanyn jáne saılaý úlgisi ózgergenin de tilge tıek etti. Mundaı sharalardyń bári jergilikti jerde básekeli saıası orta qalyptastyryp, eldiń aldynda bedeli bar jańa tulǵalardyń saıasatqa kelýi úshin qolǵa alynyp otyr.
Sonymen qatar M.Áshimbaev elimizde júrgizilip jatqan júıeli saıası jańǵyrtýlar aıasynda Senattyń aldynda turǵan maqsat-mindetterge toqtaldy.
«Budan bylaı Senat óńirlerdiń múddesin qorǵaıtyn Palataǵa aınalady. Mańyzdy ekonomıkalyq jáne áleýmettik prosester negizinen aımaqtarda ótetini belgili. О́ńirlerdi keshendi túrde damytpaı, tutas el damýyn jańa deńgeıge kóterý múmkin emes. Sondyqtan Memleket basshysy bergen tapsyrmalardyń, ulttyq jobalardyń, shaǵyn jáne orta bıznesti qoldaýǵa arnalǵan baǵdarlamalardyń óńirlerde iske asyrylý barysyn baqylaýǵa basa mán beriledi», dedi Máýlen Áshimbaev.
Sondaı-aq Senat Spıkeri agrarlyq salada eńbek etip júrgen jergilikti mamandarmen jáne eńbek ujymdarymen kezdesti. Is-sharada «Jambyl oblysy turǵyndarynyń tabysyn arttyrý» jáne «Aýyldardyń densaýlyq saqtaý júıesin jańǵyrtý» pılottyq jobalaryn iske asyrý barysy talqylandy.
«Prezıdentimiz aýyl sharýashylyǵyn jáne aýyldyq aýmaqtardy damytýǵa únemi basa mán berip keledi. Aýyl sharýashylyǵy kooperasııasyn damytýǵa úlken kóńil bólinedi. Aldaǵy jyldarda memleket tarapynan osy maqsatqa 1 trıllıon teńge bólinedi. Ol 1 mıllıon aýyl turǵynyn qamtıdy. Biz bıýdjetti qaraý jáne zańnamalyq jumys barysynda osy máselelerdi nazarǵa alyp, jumys isteımiz. Sizder aıtqan usynystar men bastamalardyń bári qoldaýǵa laıyq. Olardy iske asyrý jolynda bárimiz birge belsendi jumys isteýimiz kerek», dedi M.Áshimbaev.
Oblysqa sapary kezinde Senat tóraǵasy Qarataý qalasynyń ortalyq qazandyǵynyń jaı-kúıimen jáne shahardaǵy úıler men ınfraqurylymdy qalpyna keltirý jumystarymen tanysty. Aıta keteıik, bir apta buryn bul óńirde qatty daýyl soǵyp, saldarynan aımaqtaǵy ınfraqurylymǵa, kópqabatty jáne jeke turǵyn úılerge, áleýmettik nysandarǵa, sondaı-aq elektr baǵandary men jelisine aıtarlyqtaı zardaby tıgen edi.
