Memlekettik qyzmetkerlerge qazaq tilin bilý mindetteledi

Keshe Premer-Mınıstrdiń orynbasary Gúlshara Ábdi­qa­lyqova bastaǵan Úkimet músheleri Ortalyq kommýnıkasııalar qyzmetinde brıfıng ótkizdi. Onda Úkimet otyrysynda qaralǵan máseleler sóz boldy. Úkimet otyrysynda Tilderdi damytý men qoldaný jónindegi 2011-2020 jyldarǵa arnalǵan mem­lekettik baǵdarlamanyń oryndalý ba­rysy men birqatar áleýmettik máse­leler talqylandy, dedi Pre­mer-Mınıstrdiń orynbasary. «Qa­zirgi ýaqytta sarapshylar aıtyp otyrǵandaı, Qazaqstan halqynyń 62-63 paıyzy qazaq, 92 paıyzy orys, al 16,6 paıyzy aǵylshyn tilin meńgergen. Elbasynyń júrgizip otyrǵan saıasaty – elimizde úsh tu­ǵyrly tildi damytý. Osyǵan baılanysty, búgin Úkimet otyrysynda baǵ­darlamanyń oryndalý barysy tal­qylandy», dedi G.Ábdiqalyqova. Brıfıngke qatysqan Mádenıet mınıstri Arystanbek Muhamedıuly baǵdarlama aıasynda jasalǵan jumystardyń naqty kórsetkishteri týraly áńgimeledi. «Esepti kezeńde memlekettik tildi damytý men qoldanýǵa baǵyttalǵan birqatar jumys atqaryldy. Atap aıtqanda, QAZTEST júıesin jetildirý boıynsha memlekettik tildi oqytýǵa arnalǵan 5 deńgeıden turatyn oqý-ádistemelik kesheni ázirlendi. Olar elimizdiń barlyq tilderdi oqytý ortalyqtaryna taratyldy. Endigi kezekte memlekettik qyzmetshilerge qazaq tilin meńgerýdi mindettegen durys. Muny 2015 jyldan bastap ortalyq jáne jergilikti atqarýshy organdardyń strategııalyq josparlaryna satyly túrde QAZTEST júıesin engizý arqyly sheshemiz», dep nyǵyzdady mınıstr. Densaýlyq saqtaý mınıstri Salıdat Qaıyrbekova shetelge qaraǵanda Qazaqstanda emdelý 2 ese arzan ekenin aıtty. «Salada joǵary tehnologııalardy engizýdiń arqasynda azamattarymyzdy shetelge emdelýge az jibere bastadyq. Aıtalyq, búırek almastyrý shetelde 4,5 mln. teńge tursa, Qazaqstanda mundaı operasııany ózimizdiń klınıkalarda jasap, oǵan 2,1 mln. teńge tóleımiz. Iаǵnı, eshqaıda barýdyń qajeti joq. Bir adamdy shetelge jiberip emdetkennen góri, sol qarjyǵa Qazaqstanda birneshe adamdy emdeýge bolady», dedi mınıstr. Munymen qatar, vedomstvo jumysyna jańa ádister engizilip, nátıjesinde aǵymdaǵy jyly bıýdjet qarajaty aıtarlyqtaı únemdelipti. Buryndary salada kóp qarjy stasıonarlarǵa, qymbat emdeý sharalaryna jumsalady eken. Búginderi stasıonarlardyń aqsha paıdalaný deńgeıin tómendete alǵan mınıstrlik kúndizgi stasıonarlar qyzmetin keńeıtýdiń arqasynda 76 mlrd. teńge únemdepti. Brıfıngte Bilim jáne ǵylym mınıstrliginiń Jastar isi jónindegi komıtetiniń tóraıymy R.Káripjanova Jastar saıasatyn júzege asyrýdyń barysy týraly, О́ńirlik damý mınıstri B.Jámishev О́ńirlerdi damytýdyń biryńǵaı baǵdarlamasy jóninde, Syrtqy ister mınıstriniń orynba­sary A.Volkov Ońtústik Koreıa pre­zı­dentiniń memlekettik saparyna daıyndyqtyń barysy týraly, In­dýstrııa jáne jańa tehnologııa­lar vıse-mınıstri A.Raý energııa únem­deýdi damytý jáne energııa tıim­diligin arttyrý men shıkizattyq emes eksportty damytý jáne ilgeri­letý máseleleri taqyrybynda, Qar­jy vıse-mınıstri A.Teńgebaev qyl­mystyq jolmen alynǵan tabys­ty tazartýǵa jáne terrorızmdi qarjy­landyrýǵa qarsy turýdyń halyq­aralyq standarttaryna sáıkestikti qamtamasyz etý jóninde qabyldanǵan jáne qosymsha sharalar týraly áńgimelep, jýrnalısterdiń qoıǵan suraqtaryna jaýap berdi. Nurbaı ELMURATOV, «Egemen Qazaqstan».