Olar – Meıirim Nursultanov pen Nursultan Amanjolov. Bul eki boksshynyń da esimi jankúıerlerge jaqsy tanys. Meıirim – álem chempıony Mereı Aqshalovtyń týǵan inisi. Áýesqoılar arasynda 75 kılo salmaqta judyryqtasqan ol elimizdiń ekinshi nómirli boksshysy boldy. Jánibek Álimhanulynan «óte almaǵannan» keıin kásipqoı rıngte kúsh synasýǵa bel býdy. Ázirge aıaqalysy óte jaqsy. Nursultanov osy kúnge deıin 18 kezdesý ótkizip, barlyǵynda jeńiske jetti. 10 básekede aıqyn basymdyq tanytty.
Asa aýyr salmaqta aıqasyp júrgen Nursultan da Qazaqstan chempıonatynda júldegerler qatarynan kórinip, birqatar halyqaralyq týrnırde top jardy. Desek te ulttyq qurama bapkerleriniń tańdaýy Qamshybek Qońqabaevqa túskendikten, ol da kásipqoı boksqa aýysty. Ázirge Amanjolov tórt jekpe-jektiń barlyǵyn jeńispen aıaqtap, úsh qarsylasyn esinen tandyrdy.
