Alǵashqy aınalymda amerıkalyq Kler Lıýdi utqan otandasymyz ekinshi kezeńde ıspanııalyq Nýrııa Parrızas-Dıaspen kezdesti. Bul básekede Pýtınsevanyń basymdyǵy esh kúmán týǵyzǵan joq. 1 saǵat 20 mınýtqa sozylǵan tartys 6:2, 6:3 esebimen aıaqtaldy. Endi ol Anna Blınkovamen sheberlik baıqasady. Álemdik reıtıngte 72-orynda turǵan 24 jastaǵy reseılik tennısshiniń eń jaqsy kórsetkishi – 2019 jyly Rolan Garrostyń úshinshi kezeńine deıin jetýi. Onyń basqa baǵyndyrǵan pálendeı belesi joq. Sol sebepti de Iýlııanyń shırek fınalǵa shyǵýyna esh kedergi bolmaýǵa tıis. Sol sekildi Adelaıdadaǵy týrnırde Elena Rybakına men reseılik Anastasııa Pavlıýchenkova da sátti óner kórsetýde. Jartylaı fınalda Lıýdmıla Kıchenok (Ýkraına) pen Elena Ostapenkony (Latvıı) 6:4, 7:5 esebimen utqan bul jup aqtyq synǵa joldama aldy.
Al Aýstralııanyń ashyq birinshiliginiń irikteý týrnırine qatysqan Qazaqstannyń qos tennısshisi de sátsizdikke ushyrady. Mıhaıl Kýkýshkın japonııalyq Iosýke Vatanýkıge ese jiberse, Tımofeı Skatov chılılik Nıkolas Harrıge jol berdi.
