Keńes berý jumysyna «Jastar Rýhynyń» qyzmetkerleri, halyqty jumyspen qamtý ortalyqtarynyń, «Otbasy bank» AQ-nyń, Halyqqa qyzmet kórsetý ortalyqtarynyń, medısınalyq saqtandyrý qorynyń, «Damý» kásipkerlikti damytý qorynyń, óńirlik bilim basqarmalarynyń jáne «Atameken» Ulttyq Kásipkerler palatasynyń mamandary atsalysady.
«Jastar Rýhy» JQ tóraǵasy Nurjan Jetpisbaev jastardy tolǵandyrǵan máselelerdi sheshýge baǵyttalǵan joba turaqty túrde jumys isteıtinin atap ótti.
«Mundaı keńes berý jumystary elimizdiń barlyq óńirinde qolǵa alynady. Joba bárine birdeı qoljetimdi bolýy úshin mamandar tek qalalarda ǵana emes, sonymen qatar aýyldyq jerlerde de jastarǵa keńes beredi. Eń bastysy, bul is-shara aptasyna eki ret turaqty túrde ótkiziledi», dedi ol.
Elordadaǵy «Astanalyq» bazarynda jumys isteıtin Marlen Sardarov esimdi azamat bul joba jóninde jarnamadan bilgenin aıtady.
«Bazar qyzmetkerleriniń jumys kestesi turaqsyz. Olar tańǵy 6-dan keshki 9-10-ǵa deıin jumys isteıdi. Sondyqtan bank, emhana syndy jerlerge barýǵa ýaqyt tabyla bermeıdi. Medısınalyq saqtandyrý máselesi boıynsha suraǵym bar edi. Sol boıynsha egjeı-tegjeıli aqparat ala alǵanyma qýanyshtymyn», dedi ol.
Osyndaı jumys Shymkentte de júrgizildi. Jergilikti turǵyn Erik Rústemniń aıtýynsha, «Jastarǵa keńes» jobasy arqyly turǵyn úı baǵdarlamalary týraly aqparat alý óte yńǵaıly.
«Áleýmettik jelidegi nemese teledıdardaǵy habarlandyrýlardy bári birdeı kóre bermeıdi. Alaıda bazarda nemese ózge de qoǵamdyq oryndarda turǵyndar bank ókilderinen, sheneýnikterden ózderin tolǵandyrǵan saýaldarǵa betpe-bet jaýap ala alady», dedi ol.
Petropavlda M.Qozybaev atyndaǵy Soltústik Qazaqstan ýnıversıtetiniń stýdentteri de jobaǵa qyzyǵýshylyq tanytty.
«Jastar óz isin bastaý úshin nesıe resimdeý, ony durys tirkeý, salyqtyq jeńildikter týraly jyldam anyqtama ala alady. Iаǵnı, tek sala mamanynan alýǵa bolatyn jaýaptar beriledi», deıdi stýdent Bekzat Latypova.
Keńes berý is-sharalarynyń kestesimen «Jastar Rýhynyń» áleýmettik jelilerdegi resmı paraqshalarynan tanysýǵa bolady.
