Felıks Kýlov halyqaralyq arenada elderdiń ataýlary jıi shatastyrylatynyn atap ótken. Ol jaqynda ǵana uıymdastyrylǵan «Álem arýy» sulýlyq baıqaýynda júrgizýshiniń qyrǵyz qatysýshysyn Qazaqstannan dep tanystyrǵanyn eske aldy. Sondaı-aq onyń aıtýynsha, aǵylshyn tilinde aıtylýynyń uqsastyǵyna baılanysty Qyrǵyzstandy Kúrdistanmen de jıi shatastyrady.
«Bir kezderi men Kýba Respýblıkasy, Komı Respýblıkasy, Saha Respýblıkasy (Iаkýtııa) sekildi ataýlardy negizge alyp, bizdiń elimizge Qyrǵyz Respýblıkasy dep resmı ataý berýdi usynǵanmyn. Sol kezdegi saıası qarsylastarym meni birden synǵa aldy. Biraq keıinirek bul taqyryp mezgil ótken saıyn belsendi túrde talqylana bastady.
Bizdiń Konstıtýsııamyzda eldiń resmı tildegi ataýy «Kyrgyzskaıa Respýblıka (Qyrǵyzstan)», al memlekettik tilde «Qyrǵyz Respýblıkasy (Qyrǵyzstan)» dep aıtylady. Halyqaralyq keńistikte el ataýy «Qyrǵyz Respýblıkasy» bolsa, barlyq tilde birdeı jazylyp, birdeı aıtylady. Túsinemin, el ataýyn ózgertý tıimsiz dep aıqaılaıtyn synshylar mindetti túrde tabylady. Bálkim, búgingi kún oǵan yńǵaıly bola qoımas. Biraq nege bolashaqty oılamasqa?», dedi saıasatker.
Aıta keteıik, eldiń ataýyn ózgertý týraly pikirtalas birinshi ret týyndap otyrǵan joq. Osy jyldar ishinde saıasatkerler men qoǵam qaıratkerleri Qyrǵyzstannyń atyn Qyrǵyzstan Qurama Shtattary, Aspanasty taýlar eli, Qyrǵyzdar eli, Qyrǵyz Halyq Respýblıkasy (QHR) dep ózgertýdi usyndy. Sondaı-aq olar Bishkek ataýyn Týrdakýn nemese Manas dep ózgertýdi usynǵan. Burynǵy Ádilet mınıstri Marat Qaıypov ta 2020 jyly Konstıtýsııa jobasyn talqylaý barysynda eldiń ataýyn «Qyrǵyz Respýblıkasy» dep ózgertýdi usynǵan edi.
