Vıse-premer Altaı Kólginov aýyl halqynyń tabysyn arttyrýǵa baǵyttalǵan jobanyń alǵashqy qatysýshylarymen kezdesti. «Aýyl amanaty» baǵdarlamasyna Aqtóbe oblysyndaǵy 24 aýyldyq okrýgtiń 43 myńǵa jýyq turǵyny qatysady. Bul qus sharýashylyǵy baǵyty boıynsha 2 200-ge jýyq jobany, ósimdik sharýashylyǵy boıynsha 342, shaǵyn bıznes salasynda 224, kooperatıvterdi jaraqtandyrýdy kózdeıtin 24 jobany iske asyrýǵa múmkindik beredi.
Aqtóbe oblysy ákimdiginiń derekterine sáıkes, baǵdarlamany iske asyrý jumyssyzdar sanyn 41,4%-ǵa, ataýly áleýmettik kómek alýshylar sanyn 49,3%-ǵa qysqartýǵa múmkindik beredi. Otbasynyń ortasha tabysy 192%-ǵa artady.
Altaı Kólginov Memleket basshysynyń tapsyrmasymen 2023 jyldan bastap aýyl halqynyń tabysyn arttyrý jobasy óńirlerdiń ereksheligi men áleýmettik-ekonomıkalyq damýyn eskere otyryp, búkil el aýmaǵyn qamtıtynyn atap ótti. Osy maqsatta respýblıkalyq bıýdjetten 50 mlrd teńgeden astam qarjy bólindi. Baǵdarlamaǵa qatysatyn aýyl turǵyndary jyldyq 2,5% jeńildikpen shaǵyn nesıe ala alady.
Altaı Kólginov «Aýyl amanaty» jobasy aıasynda ótinimderdi qabyldaý jáne oqytý ortalyǵynyń jumys barysymen tanysty.
Sonymen qatar el óńirlerinde «Aýyldyq densaýlyq saqtaýdy jańǵyrtý», «Jaıly mektep» ulttyq jobalaryn iske asyrý bastaldy.
Vıse-premer Altaı Kólginov Hromtaý aýdandyq aýrýhanasynda boldy. Atalǵan aýrýhana bazasynda Ulttyq joba aıasynda aýdanaralyq ortalyq aýdandyq aýrýhana ashý josparlanyp otyr. Qazir aýrýhana 45 myńnan astam adamǵa qyzmet kórsetedi, ol Aqtóbeden 90 shaqyrym jerde ornalasqan. Teri arqyly koronarlyq aralasýlar ortalyǵyn, ınsýlt ortalyǵyn, 2-deńgeıli travmatologııalyq jáne hırýrgııalyq kómek kórsetetin bólimshelerdi aýdanaralyq ortalyq aýrýhanada ashý medısınalyq qyzmet kórsetý sapasyn edáýir jaqsartýǵa jáne olardyń sanyn keńeıtýge, halyqty eki ese qamtýǵa múmkindik beredi. Osylaısha, jaqyn mańdaǵy aýdandardyń turǵyndaryna medısınalyq kómek qoljetimdi bolmaq.
Jıynǵa Atyraý, Qyzylorda, Batys Qazaqstan, Mańǵystaý oblystary ákimderiniń orynbasarlary, densaýlyq saqtaý, eńbek jáne halyqty áleýmettik qorǵaý, oqý-aǵartý, aýyl sharýashylyǵy, mádenıet jáne sport, ulttyq ekonomıka vıse-mınıstrleri qatysty.
«Bizdiń aldymyzda halyqtyń ál-aýqatyn arttyrý mindeti tur. Birqatar óńirde Memleket basshysynyń tapsyrmasymen aýyl halqynyń tabysyn arttyrý jobasyn iske asyrý bastaldy. Bıyl «Aýyl amanaty» jobasy elimizdiń barlyq óńirinde júzege asyrylady. Bul jańa turaqty jumys oryndaryn qurýǵa, jergilikti ónimderdi shyǵarýǵa, AÁK alýshylar sanyn qysqartýǵa, jalpy aýyldar men óńirlerdiń tartymdylyǵyn arttyrýǵa múmkindik beredi», dedi Altaı Kólginov.
Sonymen qatar balalardyń sapaly bilim alýy úshin ınfraqurylym salý qajet, turǵyndar úshin medısınalyq qyzmetter qoljetimdi bolýy tıis.
«Bıyl óńirler 300 alǵashqy medısınalyq-sanıtarlyq kómek kórsetetin nysan, 221 jaıly mektep salýǵa kirisýi qajet. О́ńirlerdiń ákimdikteri qurylysty ýaqtyly bastap, salynyp jatqan obektilerdiń sapasyn baqylaýǵa, jobalardy iske asyrýǵa úlken jaýapkershilikpen qaraýy tıis. Suranys qatań bolady. Jetekshilik etetin orynbasarlar jeke jaýap beredi. Bul áleýmettik nysandar óńirlerge, aýyl turǵyndaryna qajet», dedi Altaı Kólginov.
Buǵan deıin vıse-premer Jambyl oblysynda bolyp, onda Almaty, Túrkistan, Jetisý oblystarynyń ákimdikterine ulttyq jobalardy sapaly iske asyrý boıynsha naqty mindetter belgilegen.
