Jańa tehnologııany qurylysqa qajetti shokolad tústi kirpishti jasaý úshin qoldanýǵa bolady. Ǵalymdar bul ádisti kommersııalandyrýdy jáne óndiriske engizýdi josparlap otyr.
Trımarganes tetraoksıdi boıaǵyshyn alýdyń jańa tehnologııasy patentteldi. 2022 jyly joba jetekshisi Rýslan Safarov áriptesterimen birge Ǵylym qorynyń grantyn jeńip aldy. Bul ǵylymı ázirlemeni kommersııalandyrýǵa jáne óndiriske engizýge múmkindik beredi.
«Qazaqstanda marganes kenderiniń edáýir qory bar. Olardan boıaǵysh alýǵa bolady. Biz ǵylymı zertteý júrgizip, onyń qorytyndysy boıynsha trımarganes tetraoksıdin alýdyń tehnologııasyn taptyq. Onyń úlgisin saraptaý úshin Kókshetaý qalasyndaǵy kirpish zaýytyna tapsyrdyq. Mamandar bizdiń jasaǵan ónimniń sapasy jaqsy ekendigin rastady», dedi EUÝ oqytýshy-zertteýshisi, hımııa ǵylymdarynyń kandıdaty Rýslan Safarov.
Ǵalym búginde baǵdarlamalaý tilin meńgerip, jańa daǵdylardy ǵylymı jumystarynda keńinen qoldanyp jatyr. Bul óz kezeginde zertteýlerdiń aıasyn keńeıtýge jol ashty.
«Geohımııalyq zertteýlerde biz neırondyq jelilerdi qoldana bastadyq. Hımııa, geologııa, IT qıylysyndaǵy ǵylymdardyń mundaı úılesimi jańa qyzyqty nátıjeler beredi, ıaǵnı obektilerdi ádettegi qaraý kezinde aıqyn emes zańdylyqtardy tabýǵa múmkindik jasaıdy. Men ózim baǵdarlamalaýmen, aqparattyq júıelerdi qurýmen aınalysamyn. Sondyqtan geohımııa men qorshaǵan orta obektilerin baqylaý salasynda mashınalyq oqytýdyń neırondyq jeliler jáne basqa tehnologııalar sııaqty kompıýterlik modelderdi qoldaný baǵytyn ıgeremin. Bul zertteý aıasyn keńeıtýge kómektesedi», dedi R. Safarov.
Ǵalym áriptesterimen birge qalanyń turǵyn aýdandaryndaǵy, sondaı-aq ónerkásiptik aımaqtardaǵy lastaýshy zattardyń, aýyr metaldardyń taralýyn zertteıdi.
