Ekinshi kezeńniń ashylýynda Senat Tóraǵasy qazirgi tańda synı oılaýdy júıeli túrde damytýdyń mańyzdy ekenin jáne barlyq salada sapaly taldaýǵa degen suranystyń artyp kele jatqanyn aıtty. Sondaı-aq Palata Spıkeri sarapshylar tarapynan jobaǵa degen qyzyǵýshylyqtyń joǵary bolýyna baılanysty ekinshi kezeńge qabyldanatyn ótinimder kólemi ulǵaıtylǵanyn atap ótti. Soǵan sáıkes qatysýshylar sanyn da arttyrý jóninde sheshim qabyldanǵan.
Máýlen Áshimbaev atap ótkendeı, joba memlekettik basqarýda, áleýmettik jáne gýmanıtarlyq zertteýlerde, medıa jáne basqa da salalarda taldamalyq tásilderdi kúsheıtýdi kózdeıdi. Soǵan sáıkes oqytý prosesinde sapaly taldaýdyń krıterıılerin, standarttary men erekshelikterin ıgerýge, analıtıkalyq mátinderdi jazýdyń tájirıbelik daǵdylaryn pysyqtaýǵa basymdyq beriledi. Bıylǵy oqytý kýrsy «Qazaqstannyń óńirlik damýy: problemalar men perspektıvalar» taqyrybyna arnalyp otyr.
О́z dárisinde Senat Tóraǵasy memlekettik basqarýdaǵy analıtıkalyq ádister men tásilderge nazar aýdardy. Sonymen qatar sapaly analıtıka formýlasymen jáne zertteýler men praktıkalyq daǵdylardy jetildirýge qatysty jeke tájirıbesimen bólisti.
«Qazaqstanda Memleket basshysy Qasym-Jomart Kemeluly Toqaevtyń bastamasymen aýqymdy saıası jáne áleýmettik-ekonomıkalyq reformalar iske asyrylyp jatyr. Referendým qorytyndysy boıynsha Konstıtýsııaǵa mańyzdy ózgerister engizildi. Barlyq bılik organdaryn qaıta jańǵyrtý jáne kadrlyq jańartý prosesi bastaldy. Munyń bári – saıası júıeni, ekonomıkalyq, áleýmettik salalardy ózgertetin irgeli bastamalar. Elimiz demokratııalyq jáne áleýmettik turǵydan odan ári ósip-órkendeýi úshin áli kóp jumys istelýi qajet. Sondyqtan bizge durys sheshim qabyldaı alatyn, synı oılaý jáne taldaý qabileti joǵary, bilimdi mamandar kerek», dedi Máýlen Áshimbaev.
Senat Spıkeriniń aıtýynsha, Taldaý mektebi analıtıkalyq oılaý qabiletin jetildirýge, ortamen qarym-qatynas jasaýǵa jáne netvorkıngti keńeıtýge kómektesedi.
«Analıtıkalyq jumys adamnan únemi ózin-ózi damytyp, jetildirip otyrýdy talap etedi. Qolǵa alǵan isti egjeı-tegjeı taldap, onyń mánin túsiný asa mańyzdy. Osy baǵytta óz oılaryńyzdy júıelep alyńyzdar. Ideıalaryńyzdy jetkizýdiń mańyzdy, qyzyqty jolyn izdeńizder. Eger bolyp jatqan jaǵdaıdy júıeleýdi, sapaly taldaýdy meńgerip, kásibı mátinder ázirleý biliktiligin jetildirip, dáleldi ári senimdi sóıleýdi úırenseńizder – ózderińizdiń básekege qabilettilikterińizdi jáne suranysqa ıe bolý múmkindigin arttyrasyzdar. Osy jolda bizdiń Taldaý mektebi óz septigin tıgizedi dep senemin», dedi Máýlen Áshimbaev.
