Atyraý oblysynda jer astynan kóne jádigerler tabyldy

ASTANA. 13 maýsym. Atyraý oblysynda qundy jádigerleri mol sarmat dáýiriniń qorǵany tabyldy. Bul týraly «24kz» habarlady. Halel Dosmuhamedov atyndaǵy Atyraý memlekettik ýnıversıtetiniń arheologteri kóne jádigerlerdiń ústinen tústi. Dáliregi, Sarmat dáýirine jatatyn kóne qorǵannyń bir shetinde ornalasqan qorymnan qarý-jaraq jáne áshekeı buıymdarmen birge jerlengen áıel múrdesi shyqqan. H.Dosmuhamedov atyndaǵy Atyraý ýnıversıtetiniń arheologııalyq tobynyń jetekshsi Marat Qasenov: «Mahambet aýdanyndaǵy Aqjaıyq aýyly mańyndaǵy sarmattar dáýirindegi qorǵandy qazýda altyn bilezikter men syrǵalar, kıimge taǵylǵan altyn áshekeıler tabyldy. Bul kóne zattardyń arasynda qanjar men semser, qola aına, keramıkalyq ydystardyń synyqtary, sadaq ushy bar. Qorym bizdiń zamanymyzǵa deıingi V ǵasyr men bizdiń jyl sanaýymyzdyń V ǵasyry arasyndaǵy kezeńge jatady», – dedi. Arheologtar tobynyń jetekshisiniń aıtýynsha, sarmattar Atyraý oblysyndaǵy qazirgi Kaspıı teńiziniń oıpaty men Oral taýyna deıingi Don men Saǵyz, Jem ózenderine deıingi atyrapty osydan 2,5 myń jyl buryn mekendegen. Búginde Kaspıı oıpatynda 100-ge jýyq obalar men qorǵandar anyqtaldy. Tabylǵan jádigerler kóne tarıhtan syr shertedi. Mysaly, altyn buıymdar Mysyrda jasalǵan kórinedi. Qola aına Grekııada nemese Efrat jáne Tıgr ózenderi boıyndaǵy memleketterdiń birinde jasalýy múmkin. Arheologtar tobynyń múshesi, stýdent Araılym Qalymjanova: «Kóptegen altyn buıymdardy taýyp jatyrmyz. Árıne, bul biz úshin úlken mártebe dep bilemiz. Jáne bul bizdiń Atyraý ólkesiniń tarıhyna qosqan ózindik úlesimiz dep oılaımyn. Tabylǵan jádigerler batys aımaqta ashylmaı jatqan talaı syrdyń basy ǵana», – deıdi. Qazir qorǵandy qazý jumystary odan ary jalǵastyrylýda. Odan áli de túrli kóne jádigerler kezdesýi ǵajap emes. Joldybaı Bazar. Derekkóz: «24kz». Foto: «24kz».