«QazMunaıGaz» UK AQ (QMG) Basqarma tóraǵasy Maǵzum Myrzaǵalıev qańtardyń 25-i Astana qalasynda Eni S.p.A. (ENI) munaı-gaz kompanııasynyń tabıǵı resýrstar bóliminiń barlaý jáne óndirý jónindegi dırektory Lýka Vınıatı bastaǵan ıtalııalyq delegasııamen kezdesti.
QMG men ENI ekijaqty yntymaqtastyq máselelerin talqylap, Mańǵystaý oblysynda jańartylatyn energııa kózderi (kún+jel) jáne gazben (elektrmen qamtýdy turaqtandyrý jáne gaz resýrsyn únemdeý úshin manevrlik qýat retinde) jumys isteıtin, qýaty 120 MVt gıbrıdti elektr stansasyn salý jobasyn birlesip iske asyrýǵa kelisti.
«Bul joba – qos kompanııanyń birlesken tabysty jumysynyń nátıjesi jáne Memleket basshysynyń «jasyl» jobalardy damytý jónindegi strategııalyq tapsyrmasyn iske asyrý jolyndaǵy qadam. Bastama óńirdiń energetıkalyq qaýipsizdigin nyǵaıtyp qana qoımaı, ınvestısııanyń kelýine jáne jańa jumys oryndarynyń ashylýyna múmkindik beredi», dedi óz sózinde Maǵzum Myrzaǵalıev.
Sonymen qatar kelissóz kezinde elektr energııasyn maqsatty nysandar úshin óndirý men jetkizý óndiriste jıi bolatyn elektr energııasynyń irkilisi saldarynan apattyq toqtap qalý qaýpin joıýǵa múmkindik beretini aıtyldy.
Jobany iske asyrý merzimi – 2023-2025 jyldar.
Gıbrıdti elektr stansany salý jónindegi kelisim – bul QMG men ENI kompanııalarynyń 2021 jyldyń shildesinde qol qoıylǵan elektr energııasyn óndirý jáne ótkizý úshin energetıkalyq aýysý jobalaryn ázirleýdegi yntymaqtastyq týraly memorandým aıasyndaǵy jumysynyń jalǵasy.
