Bıyl bank elimizge 1,1 mıllıard dollardan asa qarjy quıýǵa jáne halyqaralyq ınvestısııalardyń qazaqstandyq jobalarǵa tartylýyna yqpal etýge nıetti. Kólik ınfraqurylymy jáne logıstıka, ónerkásip, agroónerkásip kesheni, jasyl energetıka jáne sý resýrstary sekildi salalarǵa basymdyq beriledi.
Nıkolaı Podgýzov byltyr Eýrazııalyq damý banki Qazaqstanǵa quıylǵan ınvestısııa mólsherin 2021 jylmen salystyrǵanda 5 ese ósirip, 1,2 mılıard dollarǵa jetkizgenin, barlyq josparly kórsetkishterdi asyra oryndaǵanyn aıtty.
Sonymen qatar Memleket basshysyna elaralyq ıntegrasııalyq jobalardyń júzege asyrylý barysy jóninde baıandaldy. Atap aıtqanda, Aıagóz – Baqty temirjol jelisiniń jáne Qazaqstan men Qytaı arasyndaǵy shekara ótkeliniń qurylysy, sondaı-aq Astrahan – Mańǵyshlaq sý qubyryn jańǵyrtý sııaqty jobalar.
Budan bólek, Prezıdentke EDB basqarma tóraǵasy bıyl 15-17 mamyr kúnderi Almatyda ótetin Azııa-Tynyq muhıty aımaǵynyń damý ınstıtýttary qaýymdastyǵynyń (ADFIAP) kezdesýine daıyndyq barysyn baıandady. Jıynǵa álemniń 40 elinen 80-nen astam damý ınstıtýty, sondaı-aq halyqaralyq qurylymdar, Qazaqstan men Ortalyq Azııa elderiniń salalyq mınıstrlikteri qatysyp, elimizdiń jáne Eýrazııalyq ekonomıkalyq odaqqa múshe memleketterdiń ekonomıkasyna ınvestısııa quıý máselelerin talqylaıdy.
Qasym-Jomart Toqaev ıntegrasııalyq úderisterde Eýrazııalyq damý bankiniń belsendi ról atqaratynynatap ótti. Onyń aıtýynsha, banktiń ınfraqurylymdy jańǵyrtý jáne salý jónindegi jobalarǵa qatysýy Qazaqstan ekonomıkasynyń damýyna aıtarlyqtaı úles qosady.
