2022 jyly halyqaralyq ınstıtýsıonaldyq ınvestorlardyń kóbi, onyń ishinde zeınetaqy qorlary aktıvterdi basqarýdyń teris nátıjelerine urynyp, álemdegi jaǵymsyz makroekonomıkalyq ahýal saldarynan aıtarlyqtaı shyǵynǵa ushyrady. Al Ulttyq bank nomınaldy mánde zeınetaqy aktıvteriniń oń kiristiligin kórsetti.
Buǵan deıin san márte aıtylǵandaı, zeınetaqy aktıvteri uzaqmerzimdi ınvestısııalyq sıpatqa ıe. Sáıkesinshe, ınvestısııalaýdyń negizgi maqsattarynyń biri – zeınetaqy jınaqtarynyń saqtalýy jáne uzaqmerzimdi kezeńde naqty tabys alý. Sondyqtan kiristilik pen ınflıasııa kórsetkishterin uzaq merzimde qarastyrǵan jón.
Uzaqmerzimdi perspektıvada zeınetaqy jınaqtarynyń oń sıpattaǵy naqty (jınaqtalǵan ınflıasııadan asatyn) tabystylyǵy qamtamasyz etiledi. Jınaqtaýshy zeınetaqy júıesiniń negizi qalanǵan 1998 jyldan bastap 2023 jylǵy 1 qańtarǵa deıingi ınvestısııalyq kiristilik óspeli qorytyndymen birge osy kezeńdegi ınflıasııa 678,06 paıyz bolǵan kezde 732,29 paıyzdy kórsetti.
Ulttyq banktiń barlyq zeınetaqy aktıvterin BJZQ-da shoǵyrlandyrý aıaqtalǵan 2014 jyldan beri qamtamasyz etken tabysy 6,9 trln teńgeni qurady.
Eldegi ınflıasııa deńgeıin eskere otyryp, zeınetaqy jarnalarynyń mindetti túrleriniń saqtalýyna biregeı kepildiktiń qoldanylatynyn eske sala keteıik. Jekelegen kezeńdegi kiristiliktiń tómendeýi salymshynyń tólem quqyǵy bastalǵan kezde jınaqtalǵan kiristiligine áser etse de, aıyrmashylyqty memleket óteıdi. Zeınetaqy aktıvterin ınvestısııalyq basqarý men esepke alýdyń búkil júıesi ashyq ekenin umytpaıyq. Árbir salymshy enpf.kz saıtyndaǵy jeke kabınet nemese mobıldi qosymsha arqyly óziniń ınvestısııalyq tabysyn teksere alady.
