Prezıdentke Joǵary sot keńesiniń 2022 jyly atqarǵan jumystarynyń qorytyndysy, elimizdegi sýdıalar korpýsynyń jaı-kúıi jáne onyń tapsyrmalarynyń iske asyrylý barysy týraly málimet berildi.
Joǵary sot keńesi tóraǵasynyń aıtýynsha, sýdıalar korpýsynyń quramyn qaıta jańartý maqsatynda qabyldanǵan sharalardyń nátıjesinde byltyr sýdıalyq qyzmetke usynylǵan adamdardyń sany sot júıesinen ketken sýdıalardyń sanynan asyp túsken.
Memleket basshysynyń sot júıesine naqty sala mamandaryn tartý jóninde bergen tapsyrmasyn oryndaý úshin alǵash ret jekelegen quqyq salalaryndaǵy zańgerler arasynda konkýrs ótkizildi. Konkýrs jeńimpazdary aýdandyq deńgeıdi aınalyp ótip, birden oblystyq sottyń sýdıalary bola alady.
Budan bólek, Prezıdentke Keńesti ınstıtýsıonaldy turǵyda nyǵaıtýǵa jáne onyń quzyretine sottardyń kadrlyq máselelerin berýge, sondaı-aq sýdıalardyń tártiptik jaýapkershiligi ınstıtýtyn jetildirýge baǵyttalǵan jospar týraly baıandaldy. Sonymen qatar sýdıalardy irikteý isin jetildirý jáne onyń ashyqtyǵy men tıimdiligin qamtamasyz etý jumystary jalǵasady.
Kezdesý sońynda Memleket basshysy birqatar naqty tapsyrma berip, sot júıesindegi reformalardy sapaly júzege asyrý qajettigin atap ótti.
