Aleppo, Latakııa, Hama, Tartýs provınsııalarynda jáne Idlıb aımaǵynyń aýyldyq jerlerinde ǵımarattar qatty qıraǵan.
«Barlyq memlekettik jáne jekemenshik medısınalyq mekemeler eskertýler men qońyraýlarǵa jaýap berip, barlyq dárigerler barynsha jumys istep jatyr», dep habarlady Sırııanyń Densaýlyq saqtaý mınıstrligi.
Zardap shekken aımaqtarǵa jedel járdem kólikteri men jyljymaly klınıkalar jiberildi. Human Rights Watch Sırııa monıtorıng ortalyǵynyń (SOHR) málimetinshe, elde barlyǵy 1 597 adam zilzalanyń qurbany bolǵan.
Sırııa prezıdenti Bashar Asadtyń atyna Iran, Reseı, Birikken Arab Ámirlikteri, Oman, Aljır, Bahreın, Iordanııa, Qytaı, Belarýs, Palestına jáne Irak elderiniń basshylary kóńil aıtý jedelhatyn joldap jatyr.
Sondaı-aq aımaqtaǵy birqatar elder, atap aıtqanda: Lıvan, Kýveıt, Týnıs, Saýd Arabııasy jáne Vatıkan Sırııaǵa qoldaý bildirdi. Arab lıgasynyń bas hatshysy Ahmed Abýl Geıt shyn júrekten kóńil aıtyp, álemdik qaýymdastyqty tabıǵı apattan zardap shekkenderge kómek kórsetýge shaqyrdy.
BAÁ prezıdenti sheıh Muhammad ben Zaıd Ál Nahaıan Sırııaǵa izdeý-qutqarý toby men gýmanıtarlyq kómek jiberip, dalalyq emdeý pýnkterin ashý maqsatynda qajetti mamandardy jumyldyrdy.
Reseı tarapy tótenshe jaǵdaılar mınıstrliginiń eki ushaǵy men qutqarýshylar tobyn jiberdi.
Aıta keteıik, Túrkııanyń ońtústik-shyǵysyndaǵy Kahramanmarash provınsııasynyń Pazardjık aımaǵynda 7,4 baldyq jer silkinisi boldy. Rejep Taıyp Erdoǵan Túrkııada jalpyulttyq aza tutý kúnin jarııalady. Sońǵy málimetter boıynsha, Túrkııadaǵy jer silkinisinen zardap shekkender sany 3 381 adamǵa jetti.
