2023 jyldyń III toqsanyna deıin jol júrý bıleti joq balalardy qoǵamdyq kólikten túsirýge zańmen tyıym salý máselesi retteledi. Atalǵan sharaǵa bıýdjetten qarajat bólinbeıdi. Bul týraly Oqý-aǵartý mınıstrligi bilim salasynda sapany qamtamasyz etý komıtetiniń 2023-2025 jyldarǵa arnalǵan keshendi josparynda jazylǵan.
Bul rette kámelet jasyna tolmaǵan balalardyń qaza bolýyna nemese jaraqattanýyna ákep soqqan jazataıym oqıǵalardyń biryńǵaı statıstıkalyq esebi ázirlenedi.
«Balalardyń quqyqtaryn qorǵaý salasyndaǵy ýákiletti organnyń janynan kámeletke tolmaǵandardyń isi jáne olardyń quqyqtaryn qorǵaý jónindegi vedomstvoaralyq komıssııa qurylady. Oǵan qosa, jol júrý qujaty joq balalardy avtobýstan túsirýge tyıym salý máselesi retteledi», delingen keshendi jospar mátininde.
Mınıstrlik naqtylaǵandaı, balalardy qorǵaýǵa baǵyttalǵan birqatar shara kelesi nátıjelerge qol jetkizýge múmkindik beredi:
- balalarǵa qatysty zorlyq-zombylyq sıpattaǵy qylmystar 2%-ǵa azaıady;
- kámelet jasyna tolmaǵandar arasynda sýısıd jasaý nemese oqtalý 1,5%-ǵa tómendeıdi;
- jyl saıyn qosymsha bilimmen qamtylatyn balalar sany 5%-ǵa artady;
- tótenshe jaǵdaı, jol-kólik oqıǵasy jáne basqa da jazataıym oqıǵadan kóz jumatyn balalar sany azaıady;
- balalardyń quqyqtaryn qorǵaý salasyndaǵy memlekettik organdardyń vedomstvoaralyq ózara is-qımylynyń tıimdiligi artady.
