Bala kútimine tólenetin járdemaqyny esepteý kezinde sońǵy 24 aıdaǵy ortasha aılyq kiris mólsheri eskeriledi. Bul týraly «Memlekettik áleýmettik saqtandyrý qory» AQ bas dırektory Nursulý Kemel «Ashyq dıalog» portalynda qoıylǵan saýalǵa bergen jaýabynda túsindirdi.
Qor dırektorynyń túsindirýinshe, «Mindetti áleýmettik saqtandyrý týraly» zańnyń 24-baby 4-tarmaǵyna sáıkes, bala kútimine baılanysty aı saıynǵy áleýmettik tólem mólsheri ananyń sońǵy 24 aıdaǵy ortasha aılyq kirisiniń 40 paıyzyn quraıdy.
Ortasha aılyq kiristi esepteý formýlasy: Ortasha aılyq kiris = (Aı saıynǵy tabys №1 + aı saıynǵy tabys №2 + aı saıynǵy tabys №3...... + aı saıynǵy tabys №24) / 24
Mysaly, bala 2022 jyly 16 qarashada týsa, áleýmettik tólemniń mólsherin anyqtaý kezinde áleýmettik saqtandyrý qoryna 2020 jylǵy qarashadan 2022 jylǵy qazanǵa deıin túsken áleýmettik aýdarymdar eskeriledi. Zańnyń 15-babynyń 5-tarmaǵyna sáıkes, bir jumys berýshiden tólenetin áleýmettik aýdarymdar eń tómengi jalaqynyń 7 eselengen mólsherinen aspaýy tıis. 2020-2021 jyldary eń tómengi jalaqy – 42 500 teńgeni, 2022 jyly – 60 myń teńgeni qurasa, bıyl ol 70 myń teńgege teń.
Sonymen qatar taǵaıyndalǵan áleýmettik tólemniń 10 paıyzy zeınetaqy qoryna aýdarylady.
