О́tken ǵasyrdaǵy sekseninshi jyldarynyń sońynda qazaq poezııasyna «Shóleıtteý jerdiń shóbi edim, Shólirkep áli kelemin, Aq jańbyr minez óleńim, kezertpeı óleńderimdi, Quıyp bir ótse dep edim», dep sybyzǵy sazdy únimen kelgen aqyn birden aldyńǵy tolqyn aǵalary men oqyrmandaryn jalt qaratty. Sodan beri ádebıette ónimdi eńbek etip, birneshe jyr jınaǵy jaryq kórdi. Qabyrǵaly qalamger Temirhan Medetbek aqynnyń shyǵarmashylyǵy týraly jazǵan maqalasynda «Qazaq óleńindegi shertpe kúı», dep baǵa bergen. Shynynda da, aqynnyń názik lırıkaǵa toly poezııasynan Arqada saltanat qurǵan shertpe kúıdiń sheberi Táttimbetten bastap, Kyzdarbek, Ábdı, Sembek, odan bergi Súgir men Ábiken Hasenovtiń týyndylaryndaǵy tuńǵıyq oı men syrshyldyq áýen esip
turady.
Ádebı keshte Aqparat jáne qoǵamdyq damý mınıstri Darhan Qydyráli Alash jyrynyń ardakúreńine aınalǵan aqyn jaıynda parasatty oı tolǵady.
– Ǵalym Jaılybaı – poezııada keń qulashty epıkalyq janrǵa da, gúl qaýashaǵyndaı názik lırıkaǵa da qatar qanat qaqqan, ekeýin sheberdiń qolynan shyqqan órimdeı qatar órgen keń tynysty aqyn. Aǵanyń sazdy óleńi, kesteli sózi, jaraý attaı jutynǵan jyrlary ár býynnyń qurdasy da, syrlasy da bolary anyq. «Aq sısa», «Qara oramal», «Tamakóshken», «Kıikqashqan», «Suraq belgi» sııaqty súıekti dúnıeleri ótken ǵasyrda halqymyz bastan keshken zulmat pen zobalańdy, qyrǵyn men súrgindi klassıkterge tán dáldikpen, shıraýy jetken shymyrlyqpen jetkizdi, – dedi ol.
Odan keıin sóz alǵan kórnekti jazýshy Tólen Ábdik aqyn poezııasyn qazirgi ádebıetimizdegi bir qubylys dep baǵalady. Basqa da zııaly qaýym ókilderi shaıyrdyń shyǵarmashylyǵy men azamattyq kelbetine toqtalyp, jyly lebizderin bildirdi. Sondaı-aq kesh aıasynda Ǵalym aǵamyz jańa óleńderin oqyp, aqyn sózine jazylǵan ánder oryndaldy.
