Bul qamshynyń tarıhy týraly jýrnalıst Qudııarbek Aǵybaev óz esteliginde: «Muqaǵalı aǵańnyń baýyrynyń úıinde otyrmyz, – dedi Jolymbet aǵam endi bir mezgilde janymyzdaǵy qyzmet etip otyrǵan jigit aǵasyn tanystyryp. Jas kezińde adamnyń jarty mıy ǵana jumys isteıdi degen ras qoı deımin. Osy jazbalardy sol kezde nege qazdaı tizip, aty-jónimen dápterge jazyp qoımadym eken dep qazir qatty ókinemin. Úıden attanarda Júkem – Jolymbet aǵam bir oǵashtaý minez tanytty. Ol baǵanaly beri kózimizge túsip, tórde ilýli turǵan qamshyny (sýrettegi qamshy) bir sát qolyna aldy. Biraz aınaldyryp qarap, oılanyp otyrdy da: – Bilesiń be, bul – Muqaǵalıdyń, aqyn Muqaǵalı Maqataevtyń ómiriniń sońynda qolynan tastamaı ustaǵan qamshysy. Oǵan ataqty bir qamshy jasaıtyn sheber syıǵa tartqan eken. Ol Qarasazǵa nemese Asyǵa, jaılaýǵa atpen shyqqanda osy qamshymen baratyn, – dedi».
Áriqaraıǵy áńgime Jolymbet esimdi kisiniń jýrnalıske Muqaǵalı aqynnyń qamshysyn syıǵa tartqany týraly órbıdi. «Men osy jádigerdi saǵan amanat etip tapsyrǵym keledi. Sen de bir qazaqtyń ardaqty azamatysyń. Aýlymyzda Muqańnyń mýzeıi ashyla qoıar emes. Ol ashylǵanǵa deıin qanshama ózi tutynǵan jeke zattary men buıymdary kóz aldymyzda qoldy boldy. Bireýler tábárik kórip, suramastan alyp ketip jatyr. Bul qamshynyń endigi ıesi sen bolasyń. Bolashaqqa aman-esen jetkizip, tabystaý da – endi seniń mindetiń. Mine, usta, qolyńa!.. Narynqoldan arǵymaq minbeseń de, aqıyq aqyn Muqaǵalı aǵańnyń qamshysyn ustap qaıt!» dedi.
Sodan beri shırek ǵasyrdan astam ýaqyt ótse de, atalǵan qamshyny Qudııarbek Aǵybaev úıiniń tórine ilip, saqtap keledi eken. Biz sóz etip otyrǵan qamshy halqy han kótergen aqynnan qalǵan qundy jádigerdiń biri ekeni sózsiz.
